ଚାନ୍ଦବାଲି ବିଧାୟକ ଓ ବିଡିଓଙ୍କ ଘର କଳି ଏବେ ଦାଣ୍ଡରେ ପଡି ହାଟରେ ଗଡୁଛି
ଚାନ୍ଦବାଲି (ବଡ଼ ଖବର ବ୍ୟୁରୋ): ଚାନ୍ଦବାଲି ବିଧାୟକଙ୍କ ଶଳା ଓ ଶ୍ୱଶୁର କଣ ଆଇନଠୁ ଉର୍ଦ୍ଧ୍ୱରେ କି ବୋଲି ପ୍ରଶ୍ନ କଲା ବିଜେପି । ବିଡ଼ିଓଙ୍କୁ ମାଡ଼ ମାରିଥିବା ବ୍ୟୋମକେଶ ରାୟଙ୍କ ଶ୍ୱଶୁର ଓ ଶଳାଙ୍କୁ କାହିଁକି ଗିରଫ କରୁନି ପୋଲିସ । ଚାନ୍ଦବାଲି ବିଡ଼ିଓ ଥାନାରେ ଏତଲା ଦେବା ସତ୍ତ୍ୱେ ପୋଲିସ କାର୍ୟ୍ୟାନୁଷ୍ଠାନ ନେଉନାହିଁ । ଓଡ଼ିଶାରେ ଆଇନର ଶାସନ ଅଛିକି ନାହିଁ ଏହା ଏକ ରାଜନୈତିକ ଏବଂ ସାମାଜିକ ପ୍ରସଙ୍ଗ ହୋଇ ଉଭା ହେଲାଣି । ମୁଖ୍ୟମନ୍ତ୍ରୀ ସବୁବେଳେ ଆଇନ ତା ବାଟରେ ଯିବ ବୋଲି କୁହନ୍ତି । କିନ୍ତୁ ଅତୀତରେ ହୋଇଥିବା ପରୀ ହତ୍ୟା, ମାହାଙ୍ଗା ଡବଲ ମର୍ଡର ଭଳି ଅନେକ ଘଟଣା, ଯେଉଁଥିରେ ଶାସକ ଦଳର ବିଧାୟକ ମାନଙ୍କର ସଂପୃକ୍ତି ଥିଲା ।
ଏ ସବୁ ଘଟଣା ଗୁଡ଼ିକରେ ମୁଖ୍ୟମନ୍ତ୍ରୀ ଠିକ୍ ଭାବରେ ତଦନ୍ତ କଲେ ନାହିଁ କି ବିଧାୟକ ମାନଙ୍କ ପାଇଁ ବି ଆଇନ ସମାନ, ଏକଥା ଦେଖାଇଲେ ନାହିଁ । ବିଜେଡି ବିଧାୟକ ମାନେ ଆଇନ ଠାରୁ ଉର୍ଦ୍ଧ୍ବରେ ଏ କଥା ରାଜ୍ୟ ସରକାର ଅନେକ ସମୟରେ ଦେଖାଇଛନ୍ତି । କିନ୍ତୁ ଏବେ ଦେଖିବାକୁ ମିଳୁଛି ଯେ, ଚାନ୍ଦବାଲିରେ ବିଜେଡ଼ି ବିଧାୟକ ବ୍ୟମୋକେଶ ରାୟଙ୍କ ଶ୍ୱଶୁର ଓ ଶଳା ମଧ୍ୟ ଆଇନରୁ ଉପରେ । କିଛି ଦିନ ତଳେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ସଭାରେ ବସିବା ପାଇଁ ବିଜେଡ଼ି ବିଧାୟକଙ୍କ ଶଳା ଓ ଶ୍ୱଶୁର ଇଚ୍ଛା କରିଥିଲେ । ଯାହାକୁ ନେଇ ବିବାଦ ହୋଇଥିଲା ଏବଂ ସେମାନେ ସ୍ଥାନୀୟ ବିଡ଼ିଓଙ୍କୁ ମାଡ଼ ମାରିଥିଲେ । ଯାହାକୁ ନେଇ ଥାନାରେ ବିଡ଼ିଓ ଏତଲା ମଧ୍ୟ ଦେଇଥିଲେ , ଆଉ ଅଭିଯୁକ୍ତ ମାନଙ୍କ ନାଁରେ ସଙ୍ଗୀନ ଦଫା ମଧ୍ୟ ଲଗାଇଛି ପୋଲିସ । ହେଲେ ଘଟଣାକୁ ଏତେ ଦିନ ବିତିଯିବା ସତ୍ତ୍ୱେ ପୋଲିସ କୌଣସି କାର୍ୟ୍ୟାନୁଷ୍ଠାନ ନେଉନାହିଁ ବୋଲି ଅଭିଯୋଗ କରିଛି ବିଜେପି ।