ରାସ୍ତା କାମରେ ଲାଗିଥିବା ମେସିନ ଜାଳିଲେ ମାଓବାଦୀ
ମାଲକାନଗିରି (ବଡ଼ ଖବର ବ୍ୟୁରୋ): ମାଓବାଦୀଙ୍କ ଲଙ୍କାକାଣ୍ଡ । ରାସ୍ତା କାମରେ ଲାଗିଥିବା ଜେସିବିରେ ନିଆଁ ଲଗାଇଲେ ନକ୍ସଲ । ସୀମାନ୍ତ ଛତିଶଗଡ଼ର କାଙ୍କେର ଜିଲ୍ଲାରେ ମାଓବାଦୀଙ୍କ ଲଙ୍କାକାଣ୍ଡ। ଗଟ୍ଟାକାଲରୁ ମେଣ୍ଡ୍ରି ପର୍ଯ୍ୟନ୍ତ ରାସ୍ତା ନିର୍ମାଣରେ ନିୟୋଜିତ ୩ଟି ଗାଡି, ଦୁଇଟି ଜେସିବି ଏବଂ ସଡ଼କ ନିର୍ମାଣ କାର୍ଯ୍ୟ କରୁଥିବା ମିକ୍ସର୍ ମେସିନରେ ନିଆଁ ଲଗାଇଲେ ମାଓବାଦୀ। ଏହି ଘଟଣାରେ ୧୫ ଅଧିକ ନକ୍ସଲ ମାଓବାଦୀ ସାମିଲ ଥିବା ଜଣାପଡିଛି।
ସମସ୍ତ ଗାଡିଗୁଡିକ ଜାଳିବା ପୂର୍ବରୁ ମାଓବାଦୀମାନେ ଘଟଣାସ୍ଥଳରେ ଥିବା ଡ୍ରାଇଭର ଏବଂ ଶ୍ରମିକମାନଙ୍କୁ ଧମକ ଦେବା ସହ ସେମାନଙ୍କୁ ସେଠାରୁ ଚାଲିଯିବାକୁ କହିଥିଲେ। ଏହି ଘଟଣା ପରେ କଣ୍ଟ୍ରାକ୍ଟରଙ୍କ ଅବହେଳା ମଧ୍ୟ ସାମ୍ନାକୁ ଆସିଛି । ନକ୍ସଲ ପ୍ରବଣ ଅଞ୍ଚଳରେ ରାସ୍ତା ନିର୍ମାଣ କାର୍ଯ୍ୟ କରୁଥିବା କଣ୍ଟ୍ରାକ୍ଟର କୌଣସି ସୁରକ୍ଷା ବିନା ପୋଲିସକୁ ନ ଜଣାଇ କାର୍ଯ୍ୟ କରୁଛନ୍ତି। ଯାହା ଫଳରେ ନକ୍ସଲମାନେ ଏହିଭଳି ଅଗ୍ନିକାଣ୍ଡ ଘଟଣାକୁ ସହଜରେ ଘଟାଇ ପାରୁଛନ୍ତି।