ଆରଏସଏସ ଓ ବିଜେପି ହିନ୍ଦୁ ନୁହଁନ୍ତି; ସେମାନେ କେବଳ ହିନ୍ଦୁ ଧର୍ମର ବ୍ୟବହାର କରନ୍ତି !
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ପୁଣିଥରେ ନିଜ ବୟାନକୁ ନେଇ କଂଗ୍ରେସ ଦଳର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧି ଚର୍ଚ୍ଚାରେ ରହିଛନ୍ତି । ଏଥର ଆରଏସଏସ ଏବଂ ବିଜେପିକୁ ଟାର୍ଗେଟ କରିଥିବାର ଦେଖିବାକୁ ମିଳିଛି । ତେବେ ଆରଏସଏସ ଓ ବିଜେପିରେ ଥିବା ଲୋକମାନେ ହିନ୍ଦୁ ନୁହଁନ୍ତି । ସେମାନେ କେବଳ ହିନ୍ଦୁ ଧର୍ମ ବ୍ୟବହାର କରୁଛନ୍ତି ବୋଲି ଅଲ ଇଣ୍ଡିଆ ମହିଳା କଂଗ୍ରେସର ମୂଳ ଦିବସ କାର୍ଯ୍ୟକ୍ରମରେ ରାହୁଲ କହିଛନ୍ତି । ଏହା ସହ ଆରଏସଏସ ଏବଂ ବିଜେପିର ଲୋକମାନେ ମହିଳା ଶକ୍ତିକୁ ଦମନ କରୁଛନ୍ତି ଏବଂ ଭୟର ବାତାବରଣ ସୃଷ୍ଟି କରୁଛନ୍ତି । ମୁଁ ଅନ୍ୟ ଯେକୌଣସି ପାର୍ଟି କିମ୍ବା ସଙ୍ଗଠନ ସହ ଜଡ଼ିତ ହୋଇ ପାରିବି ହେଲେ ଏହି ଦୁଇଟି ସଂସ୍ଥା ସହ କେବେବି ମୁଁ ଜଡ଼ିତ ହୋଇ ପାରିବି ନାହିଁ ବୋଲି ରାହୁଲ ଗାନ୍ଧି କହିଛନ୍ତି ।
କେବଳ ଏତିକି ନୁହେଁ ବରଂ ସେମାନେ ନିଜକୁ ହିନ୍ଦୁ ଦଳ ବୋଲି କହି ସାରା ଦେଶରେ ଲକ୍ଷ୍ମୀ ଏବଂ ଦୁର୍ଗା ଉପରେ ଆକ୍ରମଣ କରିଥାନ୍ତି । ଏପରିକି କେଉଁଠି ମା’ ଲକ୍ଷ୍ମୀଙ୍କ ଉପରେ କୁହନ୍ତି ତ ଆଉ କେଉଁଠି ମା’ ଦୁର୍ଗାଙ୍କ ବିଷୟରେ କହିଥାନ୍ତି । ସେମାନେ ହିନ୍ଦୁ ଧର୍ମ ବ୍ୟବହାର କରନ୍ତି, ଧର୍ମକୁ ଦଲାଲି କରିଥାନ୍ତି । ଅପରପକ୍ଷରେ ବିଜେପି ଏବଂ ଆରଏସଏସ ଲୋକମାନେ ସାରା ଦେଶରେ ଭୟ ଖେଳେଇଛନ୍ତି । ଦେଶରେ କୃଷକମାନେ, ମହିଳାମାନେ ଭୟଭୀତ ହୋଇ ରହିଛନ୍ତି । ଆରଏସଏସ ମହିଳାମାନଙ୍କ ଶକ୍ତିକୁ ଦମନ କରିଥାଏ । କିନ୍ତୁ କଂଗ୍ରେସ ସଙ୍ଗଠନ ମହିଳା ଶକ୍ତି ପାଇଁ ସମାନ ପ୍ଲାଟଫର୍ମ ଦେଉଛି ଏବଂ କଂଗ୍ରେସ ସବୁବେଳେ ମହିଳାଙ୍କ ସହ ରହିଛି ବୋଲି କଂଗ୍ରେସ ନେତା ରାହୁଲ ଗାନ୍ଧି କହିଛନ୍ତି ।