ପୁରୁଣା ଶତ୍ରୁତାକୁ ନେଇ ଦାଦାଙ୍କୁ ହାଣିଲା ପୁତୁରା

ନିଶ୍ଚିନ୍ତକୋଇଲି (ବଡ଼ ଖବର ବ୍ୟୁରୋ): ପୁତୁରାର ଭୁଜାଲି ଚୋଟରେ ଦାଦା ଗୁରୁତର। ବିଲରେ ଧାନ ରୋଉଥିବା ବେଳେ ପଛପଟୁ ଡାହାଣ ଗୋଡକୁ ହାଣିଲା ପୁତୁରା। ଗୁରୁତର ଦାଦା ସେକ୍ କବୀରଙ୍କୁ ରକ୍ତାକ୍ତ ଅବସ୍ଥାରେ ପ୍ରଥମେ ନିଶ୍ଚିନ୍ତକୋଇଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ କଟକ ସ୍ଥାନାନ୍ତର କରାଯାଇଛି। ପୁତୁରା ସେକ୍ ଧନା ପଳାଇ ଯାଉଥିବା ବେଳେ ଗାଁ ଲୋକେ ଗଛରେ ବାନ୍ଧି ପୋଲିସକୁ ଖବର ଦେଇଥିଲେ । ଏଭଳି ଘଟଣା ଘଟିଛି କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା କଟିକଟା ପଂଚାୟତରେ ।

ପାଟସାଇଲୋ ଗାଁରେ ସୋମବାର ଅପରାହ୍ନରେ ବିଲରେ ସେକ୍ କବୀର ଧାନ ରୋଉଥିବା ବେଳେ ପଛପଟୁ ତାଙ୍କ ପୁତୁରା ସେକ୍ ଧନା ଏକ ଭୁଜାଲି ଧରି ଆସି ପଛପଟୁ କବୀରଙ୍କ ଡ଼ାହାଣ ଗୋଡ଼କୁ ହାଣି ଦୌଡି ପଳାଉଥିଲା । ଏହା ଦେଖି ଗାଁ ଲୋକେ ପୁତୁରାକୁ କାବୁ କରିଥିଲେ । ହାତରେ ମାରଣାସ୍ତ୍ର ଥିବାରୁ ଲୋକମାନେ ଏକାଠି ହୋଇ ଧନାକୁ ଏକ ଗଛରେ ବାନ୍ଧି ଦେିଥିଲେ । ପରେ ସ୍ଥାନୀୟ ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ଧନାକୁ ଉଦ୍ଧାର କରି ଥାନାକୁ ନେଇଛି। ପୂର୍ବ ଶତ୍ରୁତାକୁ ନେଇ ଏହି ଆକ୍ରମଣ ହୋଇଥିବା ଜଣାପଡ଼ିଛି । ପୋଲିସ ଘଟଣାର ତଦନ୍ତ ଜାରି ରଖିଛି।