ଭୁବନେଶ୍ୱର(ବଡ଼ ଖବର ବ୍ୟୁରୋ): ଖୁବ ଜୋରରେ ସ୍ଥଳଭାଗ ଆଡ଼କୁ ମାଡ଼ି ଆସୁଛି ବାତ୍ୟା ଗୁଲାବ । ମଧ୍ୟରାତ୍ର ମଧ୍ୟରେ ଶ୍ରୀକାକୁଲମ ଜିଲ୍ଲାରେ ସ୍ଥଳଭାଗ ଛୁଇଁବ । ସ୍ଥଳଭାଗ ଛୁଇଁବା ସମୟରେ ଘଣ୍ଟାପ୍ରତି ୭୫-୮୫ କିଲୋମିଟର ବେଗରେ ପବନ ବହିବ ବୋଲି ଏସଆରସି ସୂଚନା ଦେଇଛନ୍ତି । ଏହା ସହ ଗଞ୍ଜାମ, ଗଜପତି, କୋରାପୁଟ, ରାୟଗଡ଼ା , ମାଲକାନଗିରିରେ ବାତ୍ୟା ଅଧିକ ପ୍ରଭାବ ପକାଇବ । ଏହି ଜିଲ୍ଲାମାନଙ୍କରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏପରିକି ପବନରେ ପୁରୁଣା ଗଛ, ବିଦ୍ୟୁତ ଲାଇନ ମଧ୍ୟ ଉପୁଡ଼ିପାରେ ।
ସେହିପରି ଭୂସ୍କଳନ ପାଇଁ ଗଜପତି, କନ୍ଧମାଳ, ରାୟଗଡ଼ା ଜିଲ୍ଲାମାନଙ୍କୁ ସତର୍କ କରାଯାଉଛି । ଏନେଇ ଓଡ୍ରାଫ ଓ ଏନଡିଆରଏଫ ସମ୍ପୃକ୍ତ ଅଞ୍ଚଳକୁ ପହଞ୍ଚିସାରିଛନ୍ତି । ଅନ୍ୟପଟେ ବାତ୍ୟା ଗୁଲାବକୁ ନେଇ ମୁଖ୍ୟମନ୍ତ୍ରୀ ଆଜି ୧୧ଟି ଜିଲ୍ଲାର ଜିଲ୍ଲାପାଳଙ୍କ ସହ ସମୀକ୍ଷା ବୈଠକ କରିଛନ୍ତି । ତେବେ ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି, ନବରଙ୍ଗପୁର, କନ୍ଧମାଳ, ଖୋର୍ଦ୍ଧା, ପୁରୀ, ନୟାଗଡ଼ ଓ କଳାହାଣ୍ଡି ଜିଲ୍ଲାପାଳଙ୍କ ସହ ଆଲୋଚନା କରିଛନ୍ତି ।
କୋଭିଡ ସ୍ଥିତି ଥିବାରୁ ସ୍ଥାନାନ୍ତର କରି ଅଧିକ ଲୋକଙ୍କୁ ନ ରଖିବା ପାଇଁ ନିର୍ଦ୍ଦେଶ ଦିଆଯାଇଛି । ସମସ୍ତଙ୍କୁ ମାସ୍କ ଦିଆଯିବା ସହ ବାତ୍ୟା ଆଶ୍ରୟ ସ୍ଥଳରୁ ଫେରିବା ପରେ ତାଙ୍କ ଉପରେ ନଜର ରଖାଯିବ ବୋଲି ସୂଚନା ମିଳିଛି । ବାତ୍ୟାକୁ ଦୃଷ୍ଟିରେ ରଖି ୧୧ ଜିଲ୍ଲାରେ ସ୍କୁଲ ଓ ବିଭିନ୍ନ ଶିକ୍ଷାନୁଷ୍ଠାନକୁ ବନ୍ଦ କରାଯାଇଛି ।
