ଆଇନକୁ ହାତକୁ ନେଲେ ଗ୍ରାମବାସୀ

ବସ୍ତା (ବଡ଼ ଖବର ବ୍ୟୁରୋ):ଆଇନକୁ ହାତକୁ ନେଲେ ଲୋକେ । ଛେଳି ଚୋରକୁ ନିର୍ଧୁମ ଛେଚିଲେ । ସେତିକିରେ ମନ ଶାନ୍ତ ହେଲାନି । ବେକରେ ଜୋତାମାଳ ପିନ୍ଧାଇ ଗାଁ ଦାଣ୍ତରେ ବୁଲାଇଲେ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ବାଲେଶ୍ବର ଜିଲ୍ଲା ବସ୍ତା ଥାନା ସାନଖୁଡି ଗ୍ରାମର କରୁଣାକର ଦାସ ସେହି ଗ୍ରାମର ବଂଶୀଧର ଦାସଙ୍କ ଘରୁ ଏକ ଛେଳି ଚୋରି କରିଥିଲେ । କୌଣସି ସୂତ୍ରରୁ ଖବର ପାଇ ବଂଶୀଧର ଏବଂ ତାଙ୍କ ପୁଅ ବାପି କରୁଣାକରଙ୍କୁ କାବୁ କରିଥିଲେ । ପରେ ବସିଥିଲା ଗାଁ ଲୋକଙ୍କ ବୈଠକ । କରୁଣାକର ଛେଳି ଚୋରି କରିଥିବା ସ୍ପଷ୍ଟ ହେବା ପରେ ଗ୍ରାମର ମହିଳାମାନେ ଏକଜୁଟ ହୋଇଥିଲେ । କରୁଣାକରଙ୍କୁ ନିର୍ଧୁମ ଛେଚିବା ସହ ବେକରେ ଜୋତା ମାଳ ପକାଇ ଗାଁ ଦାଣ୍ତରେ ବୁଲାଇଥିଲେ । ପରେ କରୁଣାକରଙ୍କୁ ପୋଲିସ ଜିମା ଦେଇଥିଲେ ।