ମାଫିଆଙ୍କ ଟାର୍ଗେଟରେ କଇଁଛ

ମାଲକାନଗିରି (ବଡ଼ ଖବର ବ୍ୟୁରୋ): ମାଫିଆଙ୍କ ଟାର୍ଗେଟରେ କଇଁଛ । ୧୫୫ ଜୀବନ୍ତ କଇଁଛ ଉଦ୍ଧାର । ବନ୍ୟଜନ୍ତୁ ଚୋରାଚାଲାଣ ବିରୋଧରେ ବଡ଼ କାର୍ଯ୍ୟାନୁଷ୍ଠାନ ନେଇଛି ମାଲକାନଗିରି ବନ ବିଭାଗ। ମାଲକାନଗିରି ବନାଞ୍ଚଳ ଅଧୀନ ତମସା ଗାଁ ନିକଟରୁ ୧୫୫ଟି ଜୀବନ୍ତ ଫ୍ଲାପ୍-ସେଲ୍ କଇଁଛ ସହ ଏକ ଅଟୋ ଜବତ କରାଯାଇଛି । ବନ ବିଭାଗର ସୂଚନା ଅନୁସାରେ, ମଙ୍ଗଳବାର ମାଲକାନଗିରି ରେଞ୍ଜ ଅଫିସରଙ୍କୁ ଅଞ୍ଚଳରେ କଇଁଛ ଚୋରାଚାଲାଣ ହେଉଥିବା ନେଇ ଗୁପ୍ତ ସୂଚନା ମିଳିଥିଲା ।

ସୂଚନା ପାଇବା ପରେ ବନ ବିଭାଗର ଏକ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା । ବନ ବିଭାଗର ଗାଡ଼ିକୁ ଦେଖି ଅଟୋ ଚାଳକ ଓ ଜଣେ ସନ୍ଦିଗ୍ଧ ଚୋରାଚାଲାଣକାରୀ ଅଟୋ ଛାଡ଼ି ଘଟଣାସ୍ଥଳରୁ ଫେରାର ହୋଇଯାଇଥିଲେ । ପରେ ବନ ବିଭାଗ ଅଟୋକୁ ଯାଞ୍ଚ କରିବା ସମୟରେ ସେଥିରୁ ୧୫୫ଟି ଜୀବନ୍ତ କଇଁଛ ଉଦ୍ଧାର କରିଥିଲା । ଏନେଇ ବନ ବିଭାଗ ପକ୍ଷରୁ ମାମଲା ରୁଜୁ କରାଯାଇଛି । ଚୋରାଚାଲାଣରେ ସମ୍ପୃକ୍ତ ଅଭିଯୁକ୍ତମାନଙ୍କୁ ଚିହ୍ନଟ କରି ଗିରଫ କରିବା ପାଇଁ ତଦନ୍ତ ଜାରି ରହିଛି ।