ପ୍ରଚାର ମଇଦାନରେ ଦୁଇ ମୁଖ୍ୟମନ୍ତ୍ରୀ
ଭୁବନେଶ୍ୱର (ବଡ଼ ଖବର ବ୍ୟୁରୋ): କାହାର ହେବ ଓଡ଼ିଶାରେ ସରକାର? କିଏ ଧରିବ ଶାସନ ମଙ୍ଗ । ରାଜ୍ୟରେ ମତଦାନ ତାରିଖ ପାଖେଇ ଆସୁଛି ପ୍ରଚାରର ରଙ୍ଗ ବଦଳିବାରେ ଲାଗିଛି। ଆଜି କୋରାପୁଟରେ ପ୍ରଚାର କରିବେ ଛତିଶଗଡ ମୁଖ୍ୟମନ୍ତ୍ରୀ ବିଷ୍ଣୁଦେଓ ସାଏ । କୋରାପୁଟର ଲକ୍ଷ୍ମୀପୁର ଓ ପଟ୍ଟାଙ୍ଗୀରେ ପ୍ରଚାର ସଭା କରି ବିଜେପି ପ୍ରାର୍ଥୀଙ୍କ ପାଇଁ ଭୋଟ୍ ମାଗିବେ ବିଷ୍ଣୁଦେଓ ସାଏ । ପୂର୍ବାହ୍ନ ୧୦ଟାରେ ରାୟପୁରରୁ ହେଲିକପ୍ଟର ଯୋଗେ ବାହାରି କୋରାପୁଟ ଲକ୍ଷ୍ମୀପୁରର ଅସ୍ଥାୟୀ ହେଲିପ୍ୟାଡରେ ଦିନ ୧୧ଟା ୧୦ ମିନିଟରେ ପହଞ୍ଚିବେ । ଏହାପରେ ଲକ୍ଷ୍ମୀପୁରର ପରବ ପଡିଆରେ ପ୍ରଚାର ସଭାକୁ ସମ୍ବୋଧିତ କରି ବିଜେପି ପ୍ରାର୍ଥୀଙ୍କ ପାଇଁ ଭୋଟ ମାଗିବେ । ଏହାପରେ ପଟାଙ୍ଗୀ ଯାଇ ସେଠାରେ ମଧ୍ୟ ପ୍ରଚାର କରିବା କାର୍ଯ୍ୟସୂଚୀ ରହିଛି ।
ଗତକାଲି ନବରଙ୍ଗପୁର ଜିଲ୍ଲା ରାଇଘର ବ୍ଲକ ହାଟଭରଣ୍ଡି ଠାରେ ପ୍ରଚାର କରିଥିଲେ ଛତିଶଗଡ ମୁଖ୍ୟମନ୍ତ୍ରୀ । ସେପଟେ ଆଜି ମାଲକାନଗିରିରେ ପ୍ରଚାର କରିବେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା । ମାଲକାନଗିରି ଜିଲ୍ଲା କାଲିମେଳା ବ୍ଲକର ଏମଭି -୮୨ ଗାଁରେ ପ୍ରଚାର କରିବେ ଆସାମ ମୁଖ୍ୟମନ୍ତ୍ରୀ । ସକାଳ ୧୧ଟାରେ ଏମଭି-୮୨ ଗାଁରେ ପହଞ୍ଚି ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କରିବେ । ଏହାପରେ ୧୨ଟା ୩୦ରେ ମାଥିଲିରେ ଜନସମାବେଶ କରି ଭୋଟ ମାଗିବେ ହିମନ୍ତ । ସେହିପରି ଅପରାହ୍ନ ୩ଟା ୩୦ରେ ଗଞ୍ଜାମ ଆସି ଖଲ୍ଲିକୋଟରେ ପ୍ରଚାର କରିବା କାର୍ଯ୍ୟକ୍ରମ ରହିଛି ।