ଭାରତରେ ଭୋଟ୍: ଚୀନର ଏଆଇ ଚାଲ୍ !
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଭାରତର ସାଧାରଣ ନିର୍ବାଚନ ଉପରେ ଡ୍ରାଗନର ନଜର । ନିର୍ବାଚନରେ ବ୍ୟାଘାତ ସୃଷ୍ଟି କରିବାକୁ ଏଆଇକୁ ହତିଆର କରିପାରେ ଚୀନ୍ । ଏନେଇ ବିଶ୍ୱର ଅଗ୍ରଣୀ ସଫ୍ଟୱେର କମ୍ପାନୀ ମାଇକ୍ରୋସଫ୍ଟ ଭାରତର ନିର୍ବାଚନକୁ ନେଇ ବଡ଼ ଚେତାବନୀ ଦେଇଛି । ମତଦାନକୁ ଚୀନ୍ ନିଜ ଆର୍ଟିଫିସିଆଲ ଇଂଟେଲିଜେନ୍ସ ବା ଏଆଇ ଦ୍ୱାରା ପ୍ରଭାବିତ କରିପାରେ ବୋଲି ମାଇକ୍ରୋସଫ୍ଟ ନିଜ ରିପୋର୍ଟରେ ପ୍ରକାଶ କରିଛି ।
ନିଜର ସ୍ୱାର୍ଥ ସାଧନ ପାଇଁ ଚୀନ ଏଆଇ ଆଙ୍କର ଦ୍ୱାରା କଟେଂଟ୍ ପ୍ରସ୍ତୁତ କରୁଛି । ନିର୍ବାଚନ ଫଳାଫଳରେ ଏହାର ପ୍ରଭାବ କମ ପଡିବ ବୋଲି ଜାଣିଥିଲେ ମଧ୍ୟ ପରୀକ୍ଷାନିରୀକ୍ଷା ଜାରି ରଖିଛି ଚୀନ । ମିମ୍ସ, ଭିଡିଓ, ଅଡିଓ ପ୍ରସ୍ତୁତ କରି ନିର୍ବାଚନକୁ ପ୍ରଭାବିତ କରିବାକୁ ଚେଷ୍ଟା ଚଳାଇଥିବା ମାଇକ୍ରୋସଫ୍ଟ ପକ୍ଷରୁ କୁହାଯାଇଛି । ଜାନୁଆରୀରେ ତାଇୱାନରେ ଅନୁଷ୍ଠିତ ନିର୍ବାଚନରେ ମଧ୍ୟ ଚୀନ୍ ଏହି ଭଳି ଭାବେ ହସ୍ତକ୍ଷେପ କରିଥିଲା ।
ଏଆଇ ଆଙ୍କର ବ୍ୟବହାର କରି ଚୀନ ଭାରତ ସମେତ ଆମେରିକା ଏବଂ ଦକ୍ଷିଣ କୋରିଆ ନିର୍ବାଚନରେ ବାଧା ସୃଷ୍ଟି କରିବାକୁ ଯୋଜନା କରିଛି । ଚୀନ, ଉତ୍ତର କୋରିଆ ସହାୟତାରେ ପ୍ରସ୍ତୁତ କରିଥିବା ଏକ ସାଇବର ଗ୍ରୁପ୍ ନିର୍ବାଚନରେ କାରସାଦି କରିବାକୁ ଚକ୍ରାନ୍ତ କରିଛି ।
