ବିପଦ ସଂକେତ ଘେରରେ ବ୍ରାହ୍ମଣୀ

ଭୁବନେଶ୍ୱର (ବଡ଼ ଖବର ବ୍ୟୁରୋ): ବ୍ରାହ୍ମଣୀ ନଦୀରେ ଦ୍ୱିତୀୟଥର ବନ୍ୟା ପରିସ୍ଥିତି ସୃଷ୍ଟି ହୋଇଛି । ଯାହାଫଳରେ ଶତାଧିକ ଗ୍ରାମର ୮୦ ହଜାର ଲୋକ ଜଳବନ୍ଦି ହୋଇଯାଇଛନ୍ତି । ଅଳଭାରେ ନଦୀର ବିପଦ ସଂକେତ ।

ଜଳସ୍ତର ବୃଦ୍ଧି ହୋଇ ୧୭.୪ ଫୁଟରେ ପହଞ୍ଚିଛି । ଜଳସ୍ତର ବୃଦ୍ଧି ଯୋଗୁଁ ପଟ୍ଟାମୁଣ୍ଡାଇ ବ୍ଲକ୍ର ୧୨ଟି ପଞ୍ଚାୟତ ଓ ପୌରପରିଷଦର ୧୦ଟି ୱାର୍ଡ ଜଳବନ୍ଦି ହୋଇଯାଇଛି । ବ୍ରାହ୍ମଣୀ ନଦୀରେ ଭାସିଯାଇ ଶ୍ରୀରାମପୁର ପଞ୍ଚାୟତ ପାଳପାଟଣା ଗ୍ରାମର ଦୀନବନ୍ଧୁ ଧଳଙ୍କ ମୃତ୍ୟୁ ଘଟିଛି । ଏହି ସମୟରେ ଗ୍ରାମର ପ୍ରତାପ ସାହୁଙ୍କୁ ଗାଁ ଲୋକ ଉଦ୍ଧାର କରିଛନ୍ତି । ପର୍ଯ୍ୟାପ୍ତ ଡଙ୍ଗା ନ ଥିବାରୁ ଲୋକମାନେ ଘରୁ ବାହାରି ପାରୁନାହାନ୍ତି । ଲଗାତାର ବର୍ଷା ବିପନ୍ନଙ୍କ ଦୁର୍ଦ୍ଦଶାକୁ ଆହୁରି ବଢାଇଦେଇଛି । ବନ୍ୟାପାଣିରେ କଟକ ଚାନ୍ଦବାଲି ରାସ୍ତା କଷଣଅଣ୍ଟା ଗ୍ରାମ ଉବୁଟୁବୁ ହେଉଛି । ବନ୍ୟାଜଳରେ ବହୁତ ଗ୍ରାମର ରାସ୍ତା ବୁଡ଼ି ଯାଇଥିବାବେଳେ ଗାଁ ରାସ୍ତାରେ ପାଣି ଚାଲିଛି । କୁମ୍ଭୀର ଓ ବିଷଧର ସାପର ଭୟ ଘାରିଛି । ଲୋକମାନେ ସନ୍ଧ୍ୟା ପରେ ଲୋକମାନେ ଘରୁ ବାହାରକୁ ବାହାରିପାରୁନାହାନ୍ତି । ଚଳିତ ବର୍ଷ ବନ୍ୟାରେ ଧାନ, ମୁଗ ସମେତ ସମସ୍ତ ଫସଲ ବୁଡ଼ି ନଷ୍ଟ ହୋଇଯାଇଥିବାରୁ ଏବର୍ଷର ବନ୍ୟା ପରିସ୍ଥିତିକୁ ଦେଖି ଚାଷୀଙ୍କ ମୁଣ୍ଡରେ ଚଡ଼କ ପଡ଼ିଛି । ଯେମିତି ବନ୍ୟା ପ୍ରଭାବରେ ଅଧିକ କ୍ଷୟକ୍ଷତି ନ ହୁଏ, ସେଥିପ୍ରତି ପଟ୍ଟାମୁଣ୍ଡାଇର ଜଳ ସମ୍ପଦ ବିଭାଗ ବନ୍ୟା ପରିସ୍ଥିତି ଉପରେ ସତର୍କ ଦୃଷ୍ଟି ରଖିଛନ୍ତି ।