ବଢ଼ିବ ଗରମ

ଭୁବନେଶ୍ୱର (ବଡ଼ ଖବର ବ୍ୟୁରୋ): ବଢ଼ିବ ଗରମ । ଦିନ ତାପମାତ୍ରା ୨ରୁ ୩ ଡିଗ୍ରୀ ସେଲସିୟସ୍ ବୃଦ୍ଧି ପାଇବ ଆସନ୍ତା ୩ ଦିନ ଭିତରେ । ଆଗାମୀ ଦୁଇ ସପ୍ତାହ ପାଇଁ ଜାରି ହୋଇଥିବା ପୂର୍ବାନୁମାନ ଅନୁସାରେ ରାଜ୍ୟରେ କ୍ରମାଗତ ଭାବେ ଦିନ ତାପମାତ୍ରା ବଢ଼ି ଚାଲିବ । ବର୍ଷାର ସମ୍ଭାବନା ପ୍ରାୟତଃ ନାହିଁ । ପାଗ ପୂରା ଶୁଖିଲା ରହିବ । ଫେବ୍ରୁଆରୀ ୨୭ରୁ ମାର୍ଚ୍ଚ ୫ ଭିତରେ ତାପମାତ୍ରା ୩୪ ଡିଗ୍ରୀ ଭିତରେ ରହିପାରେ । ସ୍ୱାଭାବିକ ଠାରୁ ୨-୩ ଡିଗ୍ରୀ ଅଧିକ ରହିବା ସମ୍ଭାବନା ଅଛି ।

ମାର୍ଚ୍ଚ ୬ରୁ ୧୨ ପର୍ଯ୍ୟନ୍ତ ତାତି ବେଶି ବଢ଼ିବ । ଏପରିକି ୩୬ ଡିଗ୍ରୀ ଡେଇଁଯିବ ପ୍ରାୟତଃ ଅଞ୍ଚଳରେ । କେତେକ ସ୍ଥାନରେ ୩୮ ଡିଗ୍ରୀ ପହଞ୍ଚିପାରେ । ସ୍ୱାଭାବିକଠାରୁ ୩-୪ ଡିଗ୍ରୀ ଅଧିକ ରହିପାରେ ଦିନ ତାପମାତ୍ରା । ରାତି ତାପମାତ୍ରା ମଧ୍ୟ ବଢ଼ିପାରେ । ଗୁରୁବାର ପାରଳାଖେମୁଣ୍ଡିରେ ଦିନ ତାପମାତ୍ରା ୩୫ ଡିଗ୍ରୀ, ଝାରସୁଗୁଡ଼ା ୩୪.୪, ହୀରାକୁଦ ୩୪, ଢେଙ୍କାନାଳ ୩୪ ଡିଗ୍ରୀ ସେଲସିୟସ୍ ଥିଲା । ସମ୍ବଲପୁର ୩୩.୮, ଭଦ୍ରକ ୩୩.୭, ଟିଟିଲାଗଡ଼ ୩୩.୬, ଭୁବନେଶ୍ୱର ୩୩.୬, ବାଲେଶ୍ୱର ୩୩.୨ ଡିଗ୍ରୀ ଥିବାବେଳେ ବାରିପଦା, ସୁନ୍ଦରଗଡ଼, ତାଳଚେର, ସୋନପୁର, ବରଗଡ଼, ଜଗତସିଂହପୁରରେ ପାରଦ ୩୩ ଟପିଥିଲା ।

ଏପଟେ ରାତିରେ ଏବେ ବି ପାରଦ ସ୍ୱାଭାବିକଠାରୁ କମ୍ ରହିଛି । ଯେଉଁଥିପାଇଁ ରାତି ସମୟରେ ହାଲୁକା ଥଣ୍ଡା ଏବେ ବି ଅନୁଭୂତ ହେଉଛି । କେତେକ ସ୍ଥାନରେ ଗତକାଲ ରାତି ତାପମାତ୍ରା ୧୨ରୁ ୧୫ ଡିଗ୍ରୀ ଭିତରେ ଥିଲା ।