ଭୁବନେଶ୍ୱର (ବଡ଼ ଖବର ବ୍ୟୁରୋ): ଉଭାନ ହୋଇଗଲାଣି ଶୀତ । କାଁ ଭାଁ ଲାଗୁଛି ଥଣ୍ଡା । କିଛି ସ୍ଥାନକୁ ଛାଡ଼ିଲେ ବାକି ସବୁଠି ରାତି ତାପମାତ୍ରା ୧୫ ଡିଗ୍ରୀ ଉପରେ ରହୁଛି । ଆସନ୍ତା ୧ ତାରିଖରୁ ରାତି ତାପମାତ୍ରା ଆହୁରି ବଢ଼ିବ । ଶୀତ ପୂରା ଗାଏବ ହୋଇଯିବ । ଯାହାକୁ ନେଇ ଏଭଳି ପୂର୍ବାନୁମାନ କରିଛନ୍ତି ପାଣିପାଗ ବିଶେଷଜ୍ଞ । ପାଣିପାଗ ବିଶେଷଜ୍ଞ ପୂର୍ବାନୁମାନ ଅନୁଯାୟୀ ମଙ୍ଗଳବାର ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି, ଅନୁଗୁଳ, ଢେଙ୍କାନାଳ ଓ କେନ୍ଦୁଝରରେ ଘନ କୁହୁଡ଼ି ହୋଇପାରେ । ଉପକୂଳ, ଆଭ୍ୟନ୍ତରୀଣ ଓ ଦକ୍ଷିଣ ଓଡ଼ିଶାର ବିଭିନ୍ନ ସ୍ଥାନରେ କୁହୁଡ଼ି ଦେଖାଯିବ ।
ବୁଧବାର ଗଞ୍ଜାମ, ଗଜପତି, ଜଗତ୍ସିଂହପୁର ଓ କେନ୍ଦ୍ରାପଡ଼ାରେ ଘନ କୁହୁଡ଼ି ଦେଖାଯିବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ଆକଳନ କରିଛି । ସୋମବାର ଝାରସୁଗୁଡ଼ା ଓ ରାଉରକେଲାର ରାତି ତାପମାତ୍ରା ସବୁଠୁ କମ୍ ୮ ଡିଗ୍ରୀ ଥିଲା । ଫୁଲବାଣୀରେ ୯.୫, ସୁନ୍ଦରଗଡ଼ରେ ୯.୮, କେନ୍ଦୁଝରରେ ୧୧.୨, ଦାରିଙ୍ଗିବାଡ଼ିରେ ୧୨.୫, ଭବାନୀପାଟଣାରେ ୧୩.୪, କୋରାପୁଟରେ ୧୩.୫, ବଲାଙ୍ଗୀରରେ ୧୪, ସୋନପୁର ଓ ହୀରାକୁଦରେ ୧୪.୧, ଭଦ୍ରକରେ ୧୪.୨, ନୂଆପଡ଼ାରେ ୧୪.୪, ନବରଙ୍ଗପୁରରେ ୧୪.୫ ଓ ବାଲେଶ୍ୱରରେ ୧୪.୮ ଡିଗ୍ରୀ ରେକର୍ଡ ହୋଇଛି । ପୁରୀରେ ରାତି ତାପମାତ୍ରା ସର୍ବାଧିକ ୧୯.୬ ଡିଗ୍ରୀ ରହିଥିଲା । ଗୋପାଳପୁର ଓ ପାରାଦୀପରେ ୧୯.୧, ଛତ୍ରପୁରରେ ୧୯ ଓ ଭୁବନେଶ୍ୱରରେ ୧୮.୬ ଡିଗ୍ରୀ ରେକର୍ଡ ହୋଇଛି ।
