ଆବାସ ଯୋଜନାରେ କେବେ ସାମିଲ ହେବେ ମଙ୍ଗରାଜ

ତିଗିରିଆ(ବଡ଼ ଖବର ବ୍ୟୁରୋ): ରାଜ୍ୟରେ କାର୍ଯ୍ୟକାରୀ ହେଉଛି ଆବାସ ଯୋଜନା । କିନ୍ତୁ ପ୍ରକୃତ ହିତାଧିକାରୀ ଉପକୃତ ହେଉନଥିବାରୁ ଏହି ଯୋଜନା ପ୍ରହସନ ପାଲଟିଛି । ଯାହାର ନିଚ୍ଛକ ଉଦାହରଣ ହେଉଛନ୍ତି ତିଗିରିଆ ବ୍ଲକ ହାଟମାଳ ପଞ୍ଚାୟତ ନନ୍ଦପୁର ଗ୍ରାମର ଦିନ ମଜୁରିଆ ମଙ୍ଗରାଜ ପରିଡା (୫୫) ।ଲିଙ୍ଗରାଜଙ୍କ ପରିବାର କହିଲେ ସ୍ତ୍ରୀ ଡଲି ପରିଡା ଓ ଦୁଇପୁଅ। ପୂର୍ବରୁ ମଙ୍ଗରାଜ ଦିନ ମଜୁରି ଲାଗି ପରିବାର ଚଳାଉଥିଲେ । ଗୋଟିଏ ବଖରା ଚାଳଘରେ ଚାଲିଥିଲା ତାଙ୍କ ସଂସାର । କିନ୍ତୁ ଗତ କିଛିବର୍ଷ ହେଲା ତାଙ୍କ ପେଟରେ ଘା’ ବାହାରିବା ପରେ ଆଉ ମଜୁରି ଖଟିବା ପାଇଁ ଯାଇପାରୁନଥିବା କହିଛନ୍ତି ମଙ୍ଗରାଜ। ଘରର ଅବସ୍ଥା ଦେଖି ମଙ୍ଗରାଜଙ୍କର ଗୋଟିଏ ପୁଅ ସୁରତରେ ଦାଦନ ଖଟୁଛି । ବହୁ ଅସୁବିଧାରେ ଚାରିପ୍ରାଣୀ ଗୋଟିଏ ବଖରା ଚାଳଘରେ ମୁଣ୍ଡ ଗୁଞ୍ଜିଛନ୍ତି । ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଖଣ୍ଡିଏ ପାଇବା ଆଶାରେ ଗତ ତିନିବର୍ଷ ଧରି ମଙ୍ଗରାଜ ସ୍ଥାନୀୟ ପ୍ରଶାସନିକ ଅଧିକାରୀଙ୍କ ଠାରୁ ଆରମ୍ଭ କରି ସ୍ଥାନୀୟ ବିଧାୟକଙ୍କୁ ଗୁହାରି କରି ଥକି ଗଲେଣି । ମାତ୍ର କେହି କର୍ଣ୍ଣପାତ କରୁନଥିବା କ୍ଷୋଭର ସହ କହିଛନ୍ତି ମଙ୍ଗରାଜ । ‘ବଡ ଖବର’ ମାଧ୍ୟମରେ ମଙ୍ଗରାଜଙ୍କ ସମ୍ପର୍କରେ ଜାଣିବାକୁ ପାଇଥିବା ତିଗିରିଆ ବିଡିଓ ଦୀପ୍ତିମୟୀ ବେହେରା ଯୋଗାଯୋଗ ବେଳେ କହିଛନ୍ତି । ପରିସ୍ଥିତି ଅନୁଧ୍ୟାନ ପାଇଁ ପଞ୍ଚାୟତ ନିର୍ବାହୀ ଅଧିକାରୀଙ୍କୁ ବିଡିଓ ନିର୍ଦ୍ଦେଶ ଦେଇଛନ୍ତି । ଯଦି ସେ ପ୍ରକୃତ ହିତାଧିକାରୀ ହୋଇଥିବେ ତେବେ ଖୁବଶୀଘ୍ର ପ୍ରଧାନମନ୍ତ୍ରୀ ଆବାସ ଯୋଜନା କିମ୍ବା ବିଜୁ ପକ୍କାଘର ଯୋଜନା ମାଧ୍ୟମରେ ଘର ଯୋଗାଇ ଦିଆଯିବ ବୋଲି କହିଛନ୍ତି ବିଡିଓ। ମଙ୍ଗରାଜଙ୍କୁ ଯଥାଶୀଘ୍ର ଘର ଖଣ୍ଡିଏ ଯୋଗାଇଦେବା ପାଇଁ ଅଞ୍ଚଳବାସୀ ଦାବି ଜଣାଇଛନ୍ତି।