ବିଶ୍ୱ ଟେଷ୍ଟ ଚାମ୍ପିୟନସିପ୍ ଫାଇନାଲ: ଭାରତକୁ ଆବଶ୍ୟକ ୨୮୦ ରନ, ଅଷ୍ଟ୍ରେଲିଆକୁ ଆବଶ୍ୟକ ୭ଟି ୱିକେଟ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଭାରତ ଓ ଅଷ୍ଟ୍ରଲିଆ ମଧ୍ୟରେ ଜାରି ରହିଥିବା ବିଶ୍ୱ ଟେଷ୍ଟ ଚାମ୍ପିୟନସିପ୍ ଫାଇନାଲ ମ୍ୟାଚର ଚତୁର୍ଥ ଦିନ ଖେଳ ଶେଷ ହୋଇଛି । ଆଜି ୫ମ ତଥା ଅନ୍ତିମ ଦିନ । ତେବେ ରୋଚକ ହେବାକୁ ଯାଉଛି ଏହି ମ୍ୟାଚ। ଶନିବାର ଖେଳ ଶେଷ ସୁଦ୍ଧା ଭାରତ ୩ ୱିକେଟ ହରାଇ ୧୬୪ ରନ ସଂଗ୍ରହ କରିଛି । ଏହା ସହ ଆଇସିସି ଟ୍ରଫି ହାତେଇବା ପାଇଁ ଭାରତକୁ ପଞ୍ଚମ ତଥା ଶେଷ ଦିନରେ ଆଉ ୨୮୦ ରନ ଆବଶ୍ୟକ କରୁଥିବା ବେଳେ ବିପକ୍ଷ ଦଳ ଅଷ୍ଟ୍ରେଲିଆକୁ ଆବଶ୍ୟକ ୭ଟି ୱିକେଟ ।

ଗୋଟିଏ ପଟେ ଅଷ୍ଟ୍ରେଲିଆ ଦମଦାର ବୋଲିଂ କରୁଥିବା ବେଳେ ଟିମ୍ ଇଣ୍ଡିଆ ସର୍ତକତାର ସହ ବ୍ୟାଟିଂ କରୁଛି । ଚତୁର୍ଥ ଦିନ ଖେଳ ଶେଷ ସୁଦ୍ଧା ବିରାଟ କୋହଲି ୪୪ ରନ ଏବଂ ରାହାଣେ ୨୦ ରନ କରି ଅପରାଜିତ ଅଛନ୍ତି । ତେବେ ଫର୍ମରେ ଥିବା ବିରାଟ କୋହଲି ଓ ପ୍ରଥମ ଇନିଂସରେ ସଫଳତମ ବ୍ୟାଟ୍‌ସମ୍ୟାନ୍ ଅଜିଙ୍କ୍ୟ ରାହା‌ଣେ କ୍ରିଜ୍‌ରେ ଥିବା ପର୍ଯ୍ୟନ୍ତ ସବୁକିଛି ସମ୍ଭବ।