୫ ଦଫା ଦାବୀ ପୂରଣ ପାଇଁ ଆମରଣ ଅନଶନରେ ବସିଲେ ଜେଲ କର୍ମଚାରୀ

ଆସିକା(ବଡ଼ ଖବର ବ୍ୟୁରୋ):ଗଞ୍ଜାମ ଜିଲ୍ଲା ଆସିକା ସବଜେଲରେ ଆଜି ୫ ଦଫା ଦାବୀ ନେଇ ଆମରଣ ଅନଶନରେ ବସିଛନ୍ତି ଜେଲ କର୍ମଚାରୀ । ନିଖୀଳ ଓଡିଶା କାରାଗାର କର୍ମଚାରୀ ମହାସଂଘର ଆହ୍ୱାନରେ ଗଞ୍ଜାମ ଜିଲ୍ଲାର ସାରା ଜେଲରେ କର୍ମଚାରୀ ମାନେ ଆମରଣ ଅନଶନ ଆରମ୍ଭ କରିଥିବା ବେଳେ ଆସିକା ସବଜେଲ କର୍ମଚାରୀ ମଧ୍ୟ ଆମରଣ ଅନଶନରେ ବସିଛନ୍ତି ।

ଗତ ୧୩ ତାରିଖରୁ ସେମାନେ କଳାବ୍ୟାଜ ପରିଧାନ କରି ଆନ୍ଦନ୍ଦୋଳନରେ ସାମିଲ ହେବା ସହ ୨୪ ତାରିଖ ସୁଦ୍ଧା ଦାବୀ ପୂରଣ ପାଇଁ ମହଲତ ଦେଇଥିଲେ । କିନ୍ତୁ ସରକାର ପଦକ୍ଷେପ ଗ୍ରହଣ ନ କରିବାରୁ ସେମାନେ ଅନଶନ ଆରମ୍ଭ କରିଥିବା ଜଣାପଡିଛି । ଆସିକା ସବଜେଲ କର୍ମଚାରୀ ସଂଘ ପକ୍ଷରୁ ୫ ଦଫା ଦାବୀ ପାଇଁ ଦାବୀ ଜୋର ଧରିଥିଲା ।

ୱାର୍ଡର ମାନଙ୍କ ଗ୍ରେଡ ପେ ୧୯ ଶହରୁ ୨ ହଜାର ଟଙ୍କାକୁ ବୃଦ୍ଧି, ପୁରୁଣା ପଦୋନ୍ନତି ନିୟମ ୨୦୧୨ କୁ ପୁଣି ଲାଗୁ କରିବା, ଉପଖଣ୍ଡସ୍ତରୀୟ ବଦଳୀ ନିୟମକୁ କୋହଳ ଓ ଖାଦ୍ୟ ଭତାକୁ ୪ ଶହ ଟଙ୍କାରୁ ୧୪ ଶହ ଟଙ୍କାକୁ ବୃଦ୍ଧି ନେଇ ଦାବୀ କରାଯାଇଥିଲା ।