ବାପା ପରେ ମା’ କରୋନାରେ ପ୍ରାଣ ହରାଇବା ପରେ ୩ ଶିଶୁ ଅନାଥ

ଆଳି (ବଡ଼ ଖବର ବ୍ୟୁରୋ): ଆଗପଛ କରି ବାପା ଓ ପରେ ମା’ କରୋନାରେ ପ୍ରାଣ ହରାଇବା ପରେ ଏବେ ୩ ଶିଶୁ ଅନାଥ ହୋଇଯାଇଛନ୍ତି। ଆହା ପଦେ କହିବାକୁ ପାଖରେ କେହି ନାହାନ୍ତି । ଫଳରେ ଭାଙ୍ଗିପଡ଼ିଛନ୍ତି ସେମାନେ । ଏଭଳି ହୃଦୟ ବିଦାରକ ଘଟଣା ସାମ୍ନାକୁ ଆସିଛି କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ୍ ଚଣ୍ଡିଆଗଡ଼ି ପଞ୍ଚାୟତ ଚଣ୍ଡିଆଗଡ଼ି ଗ୍ରାମରେ । ଚଣ୍ଡିଆଗଡ଼ି ଗ୍ରାମର କିଶୋର କୁମାର ରଥ ସୁଦୂର ବେଙ୍ଗାଲୁରର ହିନ୍ଦୁପୁରରେ ରହି କାମ କରିଆସୁଥିଲେ । ପାଖରେ ତାଙ୍କର ପତ୍ନୀ ସବିତା ଓ ୩ ପିଲା ମଧ୍ୟ ଥିଲେ । ନିକଟରେ କିଶୋର ଓ ତାଙ୍କ ପତ୍ନୀ ସବିତା କରୋନା ପଜିଟିଭ୍ ଚିହ୍ନଟ ହୋଇଥିଲେ।

କିଶୋର କରୋନା ସହ ଲଢ଼େଇ କରି ହସ୍ପିଟାଲରେ ଚିକିତ୍ସାଧୀନ ବେଳେ ବେଙ୍ଗାଲୁରରେ ପ୍ରାଣ ହରାଇଥିଲେ । ସବିତା ଓ ତାଙ୍କ ୩ପିଲାଙ୍କୁ ଆତ୍ମୀୟମାନେ ଘରକୁ ନେଇ ଆସିଥିଲେ । ତେବେ ସବିତାଙ୍କ ସ୍ୱାସ୍ଥ୍ୟାବସ୍ଥା ଅଧିକ ଜଟିଳ ହେବାରୁ ତାଙ୍କୁ କଟକ ବଡ଼ ମେଡିକଲରେ ଭର୍ତ୍ତି କରାଯାଇଥିଲା । ପରେ ସବିତାଙ୍କର ବି ପରଲୋକ ହୋଇଥିଲା । ଆଗେ କିଶୋର ଓ ତାଙ୍କ ମୃତ୍ୟୁର ୩ଦିନ ଯାଇଛି କି ନାହିଁ ସବିତାଙ୍କ ମୃତ୍ୟୁପରେ ଏବେ ତାଙ୍କର ୩ଶିଶୁ ଅନାଥ ହୋଇପଡ଼ିଛନ୍ତି । ବେସାହାରା ହୋଇପଡ଼ିଛନ୍ତି ଦୁଇଝିଅ ଝିଅ ସାଇପିୟା(୧୪), ଶୁଭପ୍ରିୟା(୧୨) ଓ ପୁଅ ଶୁଭ ସୁଦିପ୍ତ(୬) । ବାପାମା’ଙ୍କ ଅକାଳ ବିୟୋଗ ପରେ ୩ ଶିଶୁଙ୍କ ଉପରେ ଦୁଃଖର ପାହାଡ଼ ଭାଙ୍ଗିପଡ଼ିଛି ।