ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦେଶରେ କରୋନା ପ୍ରତିଷେଧକ ଟିକା ନେବାକୁ ବାଧ୍ୟ କରାଯିବ ନାହିାଁ ଏହା ସମ୍ପୂର୍ଣ୍ଣ ଇଚ୍ଛାଧୀନ ବୋଲି କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ କୁହାଯାଇଛି । ଏହାସହ ବିଶ୍ୱରେ ଅନ୍ୟାନ୍ୟ ଦେଶରେ ପ୍ରସ୍ତୁତ ହେଉଥିବା ଟିକା ଭଳି ଭାରତରେ ତିଆରି ହେଉଥିବା ପ୍ରତ୍ୟେକ ଟିକାର ପ୍ରଭାବ ଓ କାର୍ଯ୍ୟଦକ୍ଷତା ମଧ୍ୟ ସମାନ ବୋଲି ମନ୍ତ୍ରାଳୟ କହିଛି । ଯଦି କୌଣସି ବ୍ୟକ୍ତି ପୂର୍ବରୁ କୋଭିଡ-୧୯ ସଂକ୍ରମିତ ହୋଇସାରିଛନ୍ତି ସେ ଟିକା ନେଇପାରିବେ । ଟିକା ନେବା ଦ୍ୱାରା ତାଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇବ ।
ଜଣେ ବ୍ୟକ୍ତି ଟିକାର ଦୁଇଟି ଯାକ ଡୋଜ୍ ନେବାକୁ ପଡିବ । ପ୍ରଥମ ଡୋଜ୍ ନେବାର ୨୮ ଦିନ ଭିତରେ ଦ୍ୱିତୀୟ ଡୋଜ୍ ନେବେ । ଦ୍ୱିତୀୟ ଡୋଜ୍ ନେବାର ଦୁଇ ସପ୍ତାହ ପରେ ଶରୀରରେ କରୋନା ଭାଇରସ୍ ବିରୋଧରେ ଲଢିବାକୁ ଆଂଟିବଡି ସୃଷ୍ଟି ହେବ । ବର୍ତମାନ ଭାରତରେ ୬ଟି ଟିକାର ବିଭିନ୍ନ ପର୍ଯ୍ୟାୟ ପରୀକ୍ଷା ଚାଲିଛି । ତେବେ ଟିକା ନେବା ପରେ କିଛି ଲୋକଙ୍କ ଠାରେ ସାମାନ୍ୟ ଜ୍ୱର, ପୀଡା କିମ୍ବା ଯନ୍ତ୍ରଣା ଭଳି ପାଶ୍ୱର୍ ପ୍ରତିକ୍ରିୟା ଦେଖାଦେଇପାରେ । କ୍ୟାନସର, ଡାଇବେଟିସ, ରକ୍ତଚାପ ଭଳି ରୋଗରେ ପୀଡିତ ବ୍ୟକ୍ତିମାନେ ଔଷଧ ସେବନ କରୁଥିଲେ ମଧ୍ୟ ଟିକା ନେଇପାରିବେ । ଟିକା ନେବା ପରେ ହିତାଧିକାରୀଙ୍କୁ କେନ୍ଦ୍ରରେ ୩୦ ମିନିଟ ରହିବାକୁ ପଡିବ ।
ସେହି ସମୟରେ ତାଙ୍କଠାରେ ପାଶ୍ୱର୍ ପ୍ରତିକ୍ରିୟା ଅନୁଧ୍ୟାନ କରାଯିବ । ଯଦି ପରେ କୌଣସି ସ୍ୱାସ୍ଥ୍ୟଗତ ସମସ୍ୟା ଉପୁଜେ ତେବେ ସେ ସ୍ଥାନୀୟ ଆଶାକର୍ମୀ, ଏଏନ୍ଏମ୍ କିମ୍ବା ସ୍ୱାସ୍ଥ୍ୟ କର୍ତୃପକ୍ଷଙ୍କୁ ଜଣାଇପାରିବେ । ପ୍ରଥମ ପର୍ଯ୍ୟାୟରେ ସ୍ୱାସ୍ଥ୍ୟକର୍ମୀ ଓ ଅନ୍ୟାନ୍ୟ କରୋନା ଯୋଦ୍ଧାଙ୍କୁ ଟିକା ଦିଆଯିବ । ପରେ ୫୦ ବର୍ଷରୁ ଅଧିକ ବୟସର ତଥା ଅନ୍ୟାନ୍ୟ ରୋଗରେ ପୀଡିତ ବ୍ୟକ୍ତିଙ୍କୁ ଦିଆଯିବା ଲାଗି ପଦକ୍ଷେପ ନିଆଯିବ । ତେବେ ଟିକା ନେବାକୁ ଥିବା ହିତାଧିକାରୀଙ୍କୁ ଅନଲାଇନରେ ପୂର୍ବରୁ ନାମ ପଞ୍ଜୀକରଣ କରିବାକୁ ପଡିବ ।
