ଖୋଲିଲା ମା’ ବିରଜାଙ୍କ ମନ୍ଦିର

ଯାଜପୁର(ବଡ଼ ଖବର ବ୍ୟୁରୋ): ବହୁ ପ୍ରତୀକ୍ଷାର ଅନ୍ତ ଘଟିଲା । ଶେଷରେ ଖୋଲିଲା ମା’ ବିରଜାଙ୍କ ମନ୍ଦିର । ଦୀର୍ଘ ନଅ ମାସର ଅପେକ୍ଷା ପରେ ଶ୍ରଦ୍ଧାଳୁ ମା’ଙ୍କୁ ଦର୍ଶନ କରିବାର ସୁଯୋଗ ପାଇଛନ୍ତି । ଆଜି ସକାଳୁ ଉତ୍ସାହର ସହ ଶ୍ରଦ୍ଧାଳୁ ମାନେ ଫୁଲ ଦୀପ ପ୍ରଦାନ କରି ଦର୍ଶନ କରିଛନ୍ତି । ଭକ୍ତଙ୍କ ମହଲରେ ନାହିଁ ନଥିବା ଖୁସି ଦେଖିବାକୁ ମିଳିଛି । ସକାଳ ୬ ଟାରୁ ସଂଧ୍ୟା ୫ଟା ଯାଏଁ ଦର୍ଶନ ସମୟ ରହିଥିବା ବେଳେ ଉଭୟ ପୁରୁଷ ଓ ମହିଳା ବାରିକେଟ ମଧ୍ୟରେ ଦର୍ଶନ କରୁଛନ୍ତି । ସାମାଜିକ ଦୂରତା ମଧ୍ୟରେ ନାଭିଗୟାରେ ପୂର୍ବପୁରୁଷଙ୍କୁ ପିଣ୍ଡଦାନ କରାଯିବାକୁ ଅନୁମତି ଦିଆଯାଇଛି ।

ଭିଡକୁ ଲକ୍ଷ୍ୟ ରଖି ଆସନ୍ତା ବର୍ଷ ଜାନୁୟାରି ୧ ରୁ ୩ ତାରିଖ ଯାଏଁ ସାଧାରଣ ଦର୍ଶନ ବନ୍ଦ ରଖାଯିବ ବୋଲି ଉପଜ଼ିଲ୍ଲାପାଳ ସୂଚନା ଦେଇଛନ୍ତି । ଗତ ମାର୍ଚ୍ଚ ୧୯ ତାରିଖରୁ କରୋନା କଟକଣା ଯୋଗୁଁ ଜ଼ିଲ୍ଲାପ୍ରଶାସନ ଓ ମନ୍ଦିର ପ୍ରଶାସନଙ୍କ ନିଷ୍ପତ୍ତି କ୍ରମେ ମା’ ବିରଜାଙ୍କ ମନ୍ଦିର ବନ୍ଦ ରଖାଯାଇଥିଲା । ବର୍ତ୍ତମାନ ମା’ଙ୍କ ଦର୍ଶନ ପରେ ଶ୍ରଦ୍ଧାଳୁ ମା’ଙ୍କ ଦର୍ଶନ ଲାଭ କରି ଖୁସିଥିବା ବେଳେ ଭକ୍ତ ଓ ଭଗବାନଙ୍କ ମଧ୍ୟରେ ଥିବା ଦୂରତା ଶେଷ ହେଲାବୋଲି ସେବାୟତ କହିଛନ୍ତି ।