ଭୁବନେଶ୍ୱର(ବଡ଼ ଖବର ବ୍ୟୁରୋ): କରୋନା ମହାମାରୀ ଯୋଗୁ ଅନେକ କିଛି ଘଟଣା ଘଟିଯାଇଛି । ବହୁତ ଖରାପ ଘଟଣା ଘଟିଲେ ବି କିଛି ଭଲ ଘଟଣା ମଧ୍ୟ ଘଟିଛି । ଯେମିତିକି କରୋନା ଦେଇଛି ଆମକୁ ଦରିଦ୍ରଙ୍କ ଭଗବାନ ହୋଇ ଆସିଥିବା ଆମ ରିଅଲ ଲାଇଫ ହିରୋ ସୋନୁ ସୁଦଙ୍କୁ । ହଜାର ହଜାର ପ୍ରବାସୀ ଶ୍ରମିକଙ୍କୁ ସୋନୁ ଯୋଗାଇଛନ୍ତି ସହାୟତା । ତାଙ୍କ ଏହି ଅଭିଯାନ କରୋନା ଲକଡାଉନରୁ ଆରମ୍ଭ ହୋଇଛି, ଆଉ ଏପର୍ଯ୍ୟନ୍ତ ମଧ୍ୟ ଜାରି ରହିଛି । ସୋନୁଙ୍କ ଏହି ମହାନତା ତାଙ୍କୁ ଏକ ନୂଆ ପରିଚୟ ଦେଇଛି । ସେ ଲୋକଙ୍କ ପାଇଁ ଭଗବାନ ପାଲଟି ଯାଇଛନ୍ତି । ଏଥିପାଇଁ ତାଙ୍କ ପ୍ରତିମୂର୍ତ୍ତି ସ୍ଥାପିତ କରାଯାଇ କେଉଁଠି ମନ୍ଦିର ହୋଇଛି ତ ଆଉ କେଉଁଠି ତାଙ୍କ ନାଁରେ ଦୋକାନ । ଏବେ ଅଭିନେତା ସୋନୁ ସୁଦଙ୍କ ନାଁରେ ଆରମ୍ଭ ହୋଇଛି ଆମ୍ବୁଲାନ୍ସ ସେବା । ହାଇଦ୍ରାବାଦରେ ଗଡିଛି ସୋନୁ ସୁଦ ଆମ୍ବୁଲାନ୍ସ । ଆଉ ସବୁଠୁ ବଡ କଥା ହେଉଛି ଏହି ଆମ୍ବୁଲାନ୍ସର ଶୁଭ ଉଦଘାଟନ କରିଛନ୍ତି ଖୋଦ ସୋନୁ ସୁଦ । ହାଇଦ୍ରାବାଦରେ ବାସ କରୁଥିବା ଶିବା ନାମକ ଜଣେ ବ୍ୟକ୍ତି ସୋନୁଙ୍କ ନାଁରେ ଏହି ଆମ୍ବୁଲାନ୍ସ ସେବା ଆରମ୍ଭ କରିଛନ୍ତି । ନିକଟରେ ଶିବା ଏକ ଆମ୍ବୁଲାନ୍ସ କିଣିଥିଲେ । ପରେ ସୋନୁଙ୍କ କାମରେ ପ୍ରେରିତ ହୋଇ ସେ ଆମ୍ବୁଲାନ୍ସକୁ ସୋନୁଙ୍କ ନାଁ ଦେଇଥିଲେ । ଶିବା ମଧ୍ୟ ହାଇଦ୍ରାବାଦରେ ନିଃସ୍ୱାର୍ଥପର ଭାବେ ଲୋକଙ୍କ ସେବା କରନ୍ତି ।
Our first step….
Miles to go.Thank you sir. https://t.co/K2dTpTJWhR
— sonu sood (@SonuSood) January 20, 2021
ପେସାରେ ଶିବା ଜଣେ ସନ୍ତରଣକାରୀ । ଏବେ ସୁଦ୍ଧା ପାଣିରେ ବୁଡି ଯାଇଥିବା ୧୦୦ଜଣଙ୍କୁ ରକ୍ଷା କରି ଜୀବନ ବଞ୍ଚାଇଛନ୍ତି ସେ । ଶିବାଙ୍କ ନିଃସ୍ୱାର୍ଥପର ସେବାକୁ ଦେଖି ସେଠାକାର ଲୋକ ତାଙ୍କୁ ଟଙ୍କା ଦାନ କରିବାକୁ ଲାଗିଲେ । ସେହି ଟଙ୍କାରେ ଶିବା ଏକ ଆମ୍ବୁଲାନ୍ସ କିଣି ତା ନାଁ ସୋନୁ ସୁଦ ଆମ୍ବୁଲାନ୍ସ ସେବା ଦେଇଛନ୍ତି । ଏହି ଆମ୍ବୁଲାନ୍ସ ଉଦଘାଟନ କରିବାକୁ ସୋନୁ ସୁଦ ହାଇଦ୍ରାବାଦ ପହଞ୍ଚିଥିଲେ । ତାଙ୍କ ନାଁରେ ଆମ୍ବୁଲାନ୍ସ ସେବା ଦେଖି ସେ ବହୁତ ଖୁସି ହୋଇଥିଲେ । ଆମ୍ବୁଲାନ୍ସ ଉଦଘାଟନ କରି ସୋନୁ କହିଛନ୍ତି, ଶିବାଙ୍କ କାମ ବେଶ ପ୍ରଶଂସନୀୟ । ଆମ୍ବୁଲାନ୍ସ ଉଦଘାଟନ କରିବାକୁ ଆସି ସେ ଗର୍ବିତ । ଏଥିସହ ସୋନୁ ଦେଶ ପାଇଁ ଶିବାଙ୍କ ଭଳି ଲୋକଙ୍କ ଆବଶ୍ୟକତା ରହିଛି ଓ ସେ ବହୁତ ଭଲ କାମ କରୁଛନ୍ତି ବୋଲି କହିଛନ୍ତି ।
