ପୁରୁଷ, ମହିଳାଙ୍କ ମଧ୍ୟରେ ସମାନତା ରଖିବାକୁ ରାଷ୍ଟ୍ରପତିଙ୍କ ଆହ୍ବାନ

ଭୁବନେଶ୍ୱର(ବଡ଼ ଖବର ବ୍ୟୁରୋ): ନାରୀ, ଫୁଲଠୁ କଅଁଳ, ବଜ୍ରଠୁ ଶକ୍ତ । ସେ ଜାୟା, ଭଗ୍ନୀ । ଅନ୍ନଦାତ୍ରୀ, ଜନ୍ମଦାତ୍ରୀମଧ୍ୟ । ସେ କ୍ଷମାର ପ୍ରତୀକ, ଦୟାର ସାଗର । ଏହା ସତ୍ତେ୍ୱ ଆଜି ନାରୀ ଅସୁରକ୍ଷିତ । ସମାଜରେ ନିଜ ସମ୍ମାନ ଓ ଅଧିକାର ଜାହିରି କରିବାକୁ ତାକୁ ନୀତିପ୍ରତି ସଂଘର୍ଷ କରିବାକୁ ପଡୁଛି । ସମଗ୍ର ବିଶ୍ୱରେ ମହିଳାମାନଙ୍କ ପ୍ରତି ସମ୍ମାନ ଓ ଭଲପାଇବା ବଜାୟ ରଖିବା ପାଇଁ ପାଳନ କରାଯାଇଥାଏ ଅନ୍ତର୍ଜାତୀୟ ମହିଳା ଦିବସ । ପ୍ରତିବର୍ଷ ମାର୍ଚ୍ଚ ୮ ତାରିଖରେ ସମଗ୍ର ବିଶ୍ୱ ପାଳନ କରୁଛି ଏହି ଦିବସ । ନାରୀ ଏବେ ଅବଳା ଦୁର୍ବଳା ନୁହେଁ, ତଥାପି ଅଧିକାର ଓ ସମ୍ମାନ ଭୂଲୁଣ୍ଠିତ । ବିଭିନ୍ନ କ୍ଷେତ୍ରରେ ଅଧିକାର ପାଇବା ପାଇଁ ମହିଳାମାନେ ବହୁ ଦିନରୁ ସଂଘର୍ଷତରତ ।

ଆଜିର ଦିନରେ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ଦେଶର ଅନେକ ମହିଳା ବିଭିନ୍ନ କ୍ଷେତ୍ରରେ ଅନେକ କିର୍ତ୍ତୀମାନ ସ୍ଥାପନ କରୁଛନ୍ତି। ଆଜିର ଦିନରେ ପୁରୁଷ, ମହିଳାଙ୍କ ମଧ୍ୟରେ ସମାନତା ରଖିବାକୁ ଆହ୍ବାନ ଦେଇଛନ୍ତି ରାଷ୍ଟ୍ରପତି। ସେହିପରି ରାଜ୍ୟପାଳ ଗଣେଶୀ ଲାଲ ମଧ୍ୟ ଟ୍ବିଟ୍ କରି ମହିଳା ଦିବସର ଶୁଭକାମନା ଜଣାଇଛନ୍ତି। ମହିଳା ସଶକ୍ତିକରଣକୁ ଅଗ୍ରାଧିକାର ଦେବାକୁ ସେ ଆହ୍ୱାନ ଦେଇଛନ୍ତି ।