ଏକତରଫା ପ୍ରେମରେ ଆକ୍ରମଣ, ମା ମୃତ

କଳାହାଣ୍ଡି (ବଡ଼ ଖବର ବ୍ୟୁରୋ): ଗୋଟିଏ ପଟେ ରାଜ୍ୟ ପାଳନ କରୁଛି ବିଶ୍ୱ ମହିଳା ଦିବସ । ଅନ୍ୟପଟେ ଦିନ ଦ୍ୱିପହରରେ ମହିଳାଙ୍କୁ କରାଯାଇଛି ଛୁରାମାଡ । ଏଭଳି ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ କର୍ଲାଖୁଂଟା ଗାଁରେ । ଏକତରଫା ପ୍ରେମରୁ ଘଟିଛି ଏଭଳି ଛୁରାମାଡ । ଛୁରାମାଡରେ ଯୁବତୀଙ୍କ ମା’ଙ୍କର ମୃତ୍ୟୁ ଘଟିଛି । ଅନ୍ୟପଟେ ଯୁବତୀ ଗୁରୁତର ଆହତ ହୋଇଛନ୍ତି । ଗୁରୁତର ଅବସ୍ଥାରେ ଯୁବତୀଙ୍କୁ କେସିଙ୍ଗା ମେଡିକାଲରେ ଭର୍ତ୍ତି କରାଯାଇଛି ।

ମୃତ ମହିଳା ଜଣକ ହେଲେ ୫୫ ବର୍ଷିୟ ସିନ୍ଧୁ ବାଗ । ଅଭିଯୁକ୍ତ ତିଲକର ନାଏକକୁ କେସିଙ୍ଗା ପୋଲିସ ଗିରଫ କରିଛି । ସକାଳେ ଯୁବତୀ ଜଣକ ତାଙ୍କ ମା’ ସିନ୍ଧୁଙ୍କ ସହ ଗାଧୋଇ ସାରି ଘରକୁ ଫେରୁଥିଲେ । ଏହି ସମୟରେ ପୂର୍ବରୁ ଛକି ରହିଥିବା ତଥାକଥିତ ପ୍ରେମିକ ଯୁବତୀଙ୍କୁ ଛୁରାମାଡ କରିଥିଲା । ଝିଅକୁ ବଞ୍ଚାଇବାକୁ ଯାଇ ମା ସିନ୍ଧୁ ଗୁରୁତର ଆହତ ହୋଇଥିଲେ । ଉଭୟଙ୍କୁ ମେଡିକାଲ ନେଇଥିଲେ ମଧ୍ୟ ଡାକ୍ତର ସିନ୍ଧୁଙ୍କୁ ମୃତ ଘୋଷଣା କରିଥିଲେ ।