କେନ୍ଦୁଝର(ବଡ ଖବର ବ୍ୟୁରୋ): ପଶୁ ଓ ମଣିଷ ମଧ୍ୟରେ ରହିଛି ଅନାବିଳ ସ୍ନେହ । ପଶୁ ପ୍ରେମରେ ପାଗଳ ହେବାକୁ ପଛେଇ ନାହାନ୍ତି ଜଣେ ମହିଳା । ଏଭଳି ଏକ ଘଟଣା ଦେଖିବାକୁ ମିଳିଛି ତେଲକୋଇ ବନାଞ୍ଚଳ ଅଧିନରେ ଥିବା ବିମଳା ଫରେଷ୍ଟ ବିଟରେ । ୨ ବର୍ଷ ପୂର୍ବରୁ ଜଙ୍ଗଲରୁ ଏକ ବାରହା ଶାବକକୁ କୋଲେଇ ଆଣିଥିଲେ କୁନ୍ତଳା କୁମାରୀ । କେବଳ କୋଳେଇ ଆଣିଥିଲେ ତା ନୁହଁ ମା’ପରି କୋଳେଇ କାଖେଇ ଛୋଟ ଶାବକରୁ ବଡ କରିଥିଲେ । ଗୀତ ଗାଉଥିଲେ ଆଉ କୋଳରେ ରଖି ଆଉଁସି ଆଉଁସି ଶୁଆଇ ଦେଉଥିଲେ । ଶିଶୁ ଶାବକଟି କୁନ୍ତଳା କୁମାରୀଙ୍କ ଠାରୁ ମା’ ସ୍ନେହ ପାଇ ଏବେ ବଡ ହୋଇଗଲାଣି । ହେଲେ ଜଙ୍ଗଳ ଜନ୍ତୁ ରଖିବା ଅପରାଧ ବୋଲି ଲୋକ ମାନେ ବନବିଭାଗରେ ଅଭିଯୋଗ କରିଥିଲେ ।
ପରେ ବନବିଭାଗ ଜନ୍ତୁକୁ ଉଦ୍ଧାର କରିବା ସହ ମହିଳା ଜଣଙ୍କୁ ତେଲକୋଇ କାର୍ଯ୍ୟାଳୟକୁ ଆଣି ପଚରା ଉଚରା କରିଥିଲେ । ବନବିଭାଗ କର୍ମଚାରୀ ମହିଳାଙ୍କୁ ଜଙ୍ଗଲ ଆକ୍ଟ ବିଷୟରେ ବୁଝାଇ ବାରହାକୁ ପୁଣି ଜଙ୍ଗଳରେ ଛାଡିଦେଇଥିଲେ । କିନ୍ତୁ ମହିଳା ଜଣଙ୍କ ପାଗେଳି ହୋଇ ବାରହାକୁ ଖୋଜି ଖୋଜି ଏବେ ଜଙ୍ଗଲ ସାରା ଘୁରି ବୁଲୁଛନ୍ତି । ସେ କହୁଛନ୍ତି, ମୋ ଛୁଆ ଭୋକରେ ଥିବା ମୋ ଡାକ ଶୁଣିଲେ ଫେରି ଆସିବ । ମୁଁ ଘରକୁ ନେଇ ପୁଣି ତାର ଯତ୍ନ ନେବି । ଅନ୍ୟପଟେ ଘରେ ଜଙ୍ଗଲ ଜନ୍ତୁଙ୍କୁ ପାଳିବା ଅନୁଚିତ ବୋଲି ବନାଞ୍ଚଳ ଅଧିକାରୀ ପ୍ରମୋଦ କୁମାର ସେଠୀ କହିଛନ୍ତି ।
