‘ନବୀନ ବାବୁ ଆମକୁ ଠକିଛନ୍ତି’

ଭୁବନେଶ୍ୱର (ବଡ଼ ଖବର ବ୍ୟୁରୋ): ଷଷ୍ଠଦିନ ପରେ ଶୁକ୍ରବାର ବିଧାନସଭାର ପ୍ରଶ୍ନକାଳ ସ୍ୱଭାବିକ ହୋଇଥିଲା । ପ୍ରଶ୍ନକାଳ ଶେଷ ହେଉ ହେଉ ବାଚସ୍ପତିଙ୍କ ପୂର୍ବ ନିର୍ଦ୍ଦେଶ କ୍ରମେ ଗୃହରେ ଧାନ କିଣା ନେଇ ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ବିବୃତି ରଖିଥିଲେ । ଖାଦ୍ୟ ଯୋଗାଣ ମନ୍ତ୍ରୀଙ୍କ ଉତ୍ତରରେ ଅସନ୍ତୋଷ ଓ ଗୃହରେ କହିବାକୁ ସୁଯୋଗ ନ ମିଳିବାରୁ କଂଗ୍ରେସ ବିଧାୟକ ଦଳ ନେତା ଓ ଅନ୍ୟ ସଦସ୍ୟମାନେ ଗୃହର ମଧ୍ୟ ଭାଗରେ ବସିଥିଲେ । ପରେ ବିଜେପି ସଦସ୍ୟମାନେ ଗୃହକୁ ଆସିଲେ ।

ବିରୋଧୀ ଦଳ ନେତା ଗୃହରେ ବିବୃତି ରଖି କହିଲେ, ଧାନ କିଣା ପ୍ରସଙ୍ଗରେ ନବୀନ ବାବୁ ଆମକୁ ପ୍ରତାରଣା କରିଛନ୍ତି ଆଉ ଠକିଛନ୍ତି । ଖାଦ୍ୟ ଯୋଗାଣ ମନ୍ତ୍ରୀ ଧାନ କିଣା ନେଇ ବିବୃତି ଦେବା ପରେ ଏ କଥା ସ୍ପଷ୍ଟ ହୋଇଛି । ଗୃହରେ ମନ୍ତ୍ରୀ ପ୍ରତାପ ଜେନାଙ୍କ ପାପ ଧୋଇବା ପ୍ରସଙ୍ଗକୁ ନେଇ କଡା ଭାଷାରେ ନିନ୍ଦା କରିଥିଲେ ବିରୋଧୀ ଦଳ ନେତା ପ୍ରଦୀପ୍ତ ନାୟକ । କହିଲେ ଆମେ କ’ଣ ପାପୀ । ସରକାରଙ୍କ ଜଣେ କ୍ୟାବିନେଟ ମନ୍ତ୍ରୀ ଆମକୁ ଏପରି ଅପମାନିତ କରିବେ ।

ମନ୍ତ୍ରୀଙ୍କ ବୟାନ ପରେ ଆମେ ନବୀନ ନିବାସ ଭିତରକୁ ଯିବାକୁ ଚାହୁଁ ନଥିଲୁ । ମାତ୍ର ମୁଖ୍ୟମନ୍ତ୍ରୀଙ୍କୁ ସମ୍ମାନ ଜଣାଇ ଯାଇଥିଲୁ । ତା’ ପରେ ବି ଆମକୁ ନବୀନ ବାବୁ ଠକିଛନ୍ତି । ଏହା ପରେ ଉଭୟ ବିଜେପି ଓ କଂଗ୍ରେସ ବିଧାୟକ ମାନେ ପ୍ରବଳ ହଟ୍ଟଗୋଳ କରିଥିଲେ । ପୁଣି ଥରେ ବାଚସ୍ପତି ଡାକିଥିଲେ ସର୍ବଦଳୀୟ ବୈଠକ । ପ୍ରଥମେ ୧୦ ମିନିଟ ଓ ପରେ ୧୫ ମିନିଟ ଓ ୧୫ ମିନିଟ ପାଇଁ ଗୃହ ମୁଲତବୀ ହୋଇଛି । ଆମକୁ ପ୍ରତାରଣା କରାଗଲା ,ଆମେ ଚାଷୀଙ୍କ ପାଇଁ ଯାଇଥିଲୁ, ସମ୍ବର୍ଦ୍ଧିତ ହେବାକୁ ଯାଇନଥିଲୁ ବୋଲି ବିରୋଧୀଦଳ ନେତା କହିଛନ୍ତି ।