୪ ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଞ୍ଚଳରେ ମତଦାନ ଜାରି

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ୪ ଟି ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଞ୍ଚଳରେ ଆଜିଠୁ ଭୋଟ୍ ଗ୍ରହଣ ଆରମ୍ଭ ହୋଇଛି । ସକାଳ ୭ଟାରୁ ଏହି ଭୋଟ୍ ଗ୍ରହଣ ପ୍ରକ୍ରିୟା ଆରମ୍ଭ ହୋଇଛି । କେରଳ, ତାମିଲନାଡ଼ୁ ଓ ପୁଡ଼ୁଚେରୀରେ ଆଜି ଗୋଟିଏ ପର୍ଯ୍ୟାୟରେ ମତଦାନ ସରିବ । ତେବେ ପଶ୍ଚିମବଙ୍ଗରେ ଆଜି ତୃତୀୟ ପର୍ଯ୍ୟାୟ ନିର୍ବାଚନ ଲାଗି ମତଦାନ କରାଯାଉଛି । ସୂଚନା ମୁତାବକ, କେରଳରେ ୧୪୦ଟି ଆସନ, ତାମିଲନାଡ଼ୁରେ ୨୩୪ ଆସନ, ଆସାମର ଶେଷ ପର୍ଯ୍ୟାୟରେ ୪୦ଟି ଆସନ, ପଶ୍ଚିମବଙ୍ଗର ତୃତୀୟ ପର୍ଯ୍ୟାୟରେ ୩୧ଟି ଆସନ ସହ ପୁଡ଼ୁଚେରୀରେ ୪୦ଟି ଆସନ ପାଇଁ ଭୋଟ୍ ଗ୍ରହଣ ପ୍ରକ୍ରିୟା ଆରମ୍ଭ ହୋଇଛି ।

ଅନ୍ୟପଟେ ପଶ୍ଚିମବଙ୍ଗରେ ହେବାକୁ ଥିବା ୩୧ଟି ଆସନକୁ ଭାରତୀୟ ନିର୍ବାଚନ ଆୟୋଗ ପକ୍ଷରୁ ସମ୍ବେଦନଶୀଳ ଘୋଷଣା କରି ସିଆରପିସିର ୧୪୪ ଧାରା ଲାଗୁ କରିଛନ୍ତି । ଗତ ସୋମବାର ଠାରୁ ଏଠାରେ ନିଷେଧାଜ୍ଞ ଲାଗୁ କରାଯାଇଛି । ଫଳରେ ଆଜି ହେବାକୁ ଥିବା ନିର୍ବାଚନରେ ଅଧିକାଂଶ ଲୋକେ ଏକତ୍ରିତ ହୋଇପାରିବେ ନାହିଁ । ସେହିପରି ଆସାମର ୧୨ଟି ଜିଲ୍ଲାର ୪୦ଟି ଆସନରେ ଆଜି ମତଦାନ ଆରମ୍ଭ ହୋଇଛି । ଏହି ପର୍ଯ୍ୟାୟରେ ୩୩୭ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରାଯିବ ।