ଅଗରତାଲା (ବଡ଼ ଖବର ବ୍ୟୁରୋ): କରୋନା ଠାରୁ ଦୂରେଇ ରହିବା ପାଇଁ ବିଭିନ୍ନ ଗାଇଡ ଲାଇନ ପାଳନ କରାଯାଇଛି । ମାତ୍ର କିଛି ଅମାନିଆ ଏହାକୁ ଉଲ୍ଲଙ୍ଘନ କରୁଥିବା ଦେଖିବାକୁ ମିଳୁଛି । କରୋନା ଗାଇଡ୍ ଲାଇନ୍ ଭାଙ୍ଗି ବିବାହ ଉତ୍ସବରେ ଅଧିକ ଲୋକେ ଯୋଗଦେଇ ପ୍ରଶାସନର ରୋଶର ଶିକାର ହୋଇଛନ୍ତି । ଏଭଳି ଘଟଣା ଘଟିଛି ଅଗରତାଲାରେ । ଏକ ବିବାହ ଉତ୍ସବରେ ଅଧିକ ଲୋକ ଉପସ୍ଥିତ ଥିବାବେଳେ ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା ଭୋଜିଭାତର ଆସର । କୌଣସି ସୂତ୍ରରୁ ଖବର ପାଇ ପୋଲିସ ସହ ଜିଲ୍ଲାପାଳ ଘଟଣାସ୍ଥଳରେ ପହଞ୍ଚିଥିଲେ । ପ୍ରଥମେ ବ୍ୟାଣ୍ଡ ପାର୍ଟିକୁ ବାହାର କରିଦେଇଥିଲେ । ବିବାହ କରିବାକୁ ଆସିଥିବା ପଣ୍ଡିତଙ୍କୁ ମାଡ଼ମାରି ଘଉଡାଇବା ସହିତ ଅନୁମତିପତ୍ରକୁ ଚିରି ଫିଙ୍ଗି ଦେଇଥିଲେ । ପରେ ବିବାହ ମଣ୍ଡପକୁ ସିଲ କରିଦେଇଥିଲେ ଜିଲ୍ଲାପାଳ । ସ୍ଥାନୀୟ ବିଜେପି ବିଧାୟକ ସୁଶାନ୍ତ ଚୌଧୁରୀ କହିଛନ୍ତି ଜିଲ୍ଲାପାଳ ଯାହା କହିଛନ୍ତି ଠିକ କରିନାହାନ୍ତି । ଜଣେ ୭୦ ବର୍ଷ ବୟସ୍କ ପଣ୍ଡିତଙ୍କୁ ମାରିବା ଅଶୋଭନୀୟ କାମ ବୋଲି ସେ କହିଛନ୍ତି । ବିଧାୟକଙ୍କ ପ୍ରତିକ୍ରିୟା ପରେ ଜିଲ୍ଲାପାଳ ମଧ୍ୟ କ୍ଷମା ମାଗିଛନ୍ତି ।
