୫ଜି ଟେକ୍ନୋଲୋଜିକୁ ନେଇ କୋର୍ଟଙ୍କ ଦ୍ବାରସ୍ଥ ହେଲେ ବଲିଉଡ ଅଭିନେତ୍ରୀ ଜୁହି ଚାୱଲା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଭାରତରେ ମୋବାଇଲ ଫୋନର ୫-ଜି ଟେକ୍ନୋଲୋଜି ବିରୋଧରେ ସୋମବାର ଦିଲ୍ଲୀ ହାଇ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ଅଭିନେତ୍ରୀ ଜୁହି ଚାୱଲା । ସେ ସୋମବାର ଦିଲ୍ଲୀ ହାଇକୋର୍ଟଙ୍କ ନିକଟରେ ପହଞ୍ଚି ନାଗରିକ, ପ୍ରାଣୀ, ଉଦ୍ଭିଦ ଏବଂ ଜୀବଜନ୍ତୁଙ୍କ ଉପରେ ରେଡିଓ ଫ୍ରିକ୍ୱେନ୍ସିର ପ୍ରଭାବ ସମ୍ପର୍କିତ ପ୍ରସଙ୍ଗ ଉଠାଇଥିଲେ । ଗତ କିଛି ବର୍ଷରୁ ମୋବାଇଲ ଫୋନର ୫ଜି ଟେକ୍ନୋଲୋଜିକୁ ନେଇ ଚିନ୍ତା ପ୍ରକଟ କରିଆସୁଛନ୍ତି ବଲିଉଡ ଅଭିନେତ୍ରୀ ଜୁହି ଚାୱଲା ।
ଲୋକଙ୍କ ସ୍ବାସ୍ଥ୍ୟ ଉପରେ ରେଡିଓ ଫ୍ରିକ୍ୱେନ୍ସିର ସମ୍ଭାବିତ ହାନିକାରକ ପ୍ରଭାବ ବିଶ୍ଳେଷଣ ନକରି ୫ଜି ଲାଗୁ କରିବା ଉଚିତ ନୁହେଁ ବୋଲି ଜୁହି କହିଛନ୍ତି । ଭାରତରେ ଏହାକୁ କାର୍ଯ୍ୟକାରୀ କରାଯିବ କି ନାହିଁ ସେନେଇ ନିଷ୍ପତ୍ତି ନେବାକୁ ଆବେଦନ କରିଛନ୍ତି ଜୁହି । ଜୁହି ଚାୱଲା ରେଡିଏସନ ବିରୋଧରେ ସଚେତନତା ଆଣିବା ପାଇଁ କାର୍ଯ୍ୟ କରୁଛନ୍ତି । ଡିଜିଟାଲ ଇଣ୍ଡିଆର ଲକ୍ଷ୍ୟ ହାସଲ କରିବାକୁ କେନ୍ଦ୍ର ୫ଜି କାର୍ଯ୍ୟକାରୀ କରିବାକୁ ଯାଉଛି । ଏହି ସମୟରେ ଜୁହି ପ୍ରଶ୍ନ କରିଛନ୍ତି ଯେ ଏହି ନୂତନ ପ୍ରଯୁକ୍ତିବିଦ୍ୟା ଉପରେ କ’ଣ ମହତ୍ବପୂର୍ଣ୍ଣ ଅନୁସନ୍ଧାନ କରାଯାଇଛି?