ଭୁବନେଶ୍ୱର(ବଡ଼ ଖବର ବ୍ୟୁରୋ): ଜୁନ ଯାଇ ଜୁଲାଇ ଅଧା ହେଲାଣି, ମାତ୍ର ବର୍ଷାର ଦେଖାନାହିଁ । ବର୍ଷା ନହେବାରୁ ଚାଷୀଙ୍କ ମୁଣ୍ଡରେ ଚଡ଼କ ପଡ଼ିଛି । ଚଳିତ ବର୍ଷ ଓଡ଼ିଶାରେ ମୌସୁମୀ ବର୍ଷା ସ୍ୱାଭାବିକ ରହିବ ବୋଲି ଭାରତୀୟ ପାଣିପାଗ ବିଭାଗର ଆକଳନ ଏବେ ଭୁଲ ପ୍ରମାଣିତ ହେବ ବୋଲି ମନେହେଉଛି । ରାଜ୍ୟର ୧୭ ଜିଲ୍ଲାରେ ବର୍ଷାର ଅଭାବ ଦେଖିବାକୁ ମିଳିଛି । ଆଗାମୀ ଏକ ସପ୍ତାହ ପାଇଁ ସେଭଳି ବଡ଼ ଧରଣର ବର୍ଷା ନଥିବା ପୂର୍ବାନୁମାନ କରିଛି ଭୁବନେଶ୍ୱର ଆଞ୍ଚଳିକ ପାଣିପାଗ ବିଭାଗ ।
ଜୁନରେ ରାଜ୍ୟରେ ୧୭ ପ୍ରତିଶତ କମ ବର୍ଷା ହୋଇଛି । ରାଜ୍ୟରେ ୧୭ ପ୍ରତିଶତ କମ ବର୍ଷା ରେକର୍ଡ କରାଯାଇଥିବା ବେଳେ ଜୁଲାଇରେ ୪୧.୨ ପ୍ରତିଶତ କମ ବର୍ଷା ରହିଛି । ରାଜ୍ୟରେ ସବୁଠି ସମାନ ଚିତ୍ର । ଯେଉଁ ସମୟରେ ବନ୍ଧବାଡ଼ ବଢି ପାଣର ସୁଅ ଛୁଟିବା କଥା ସେ ସମୟରେ ବିଲ ଫାଟି ଆଁ କଲାଣି । ପାଣିପାଗ ବିଭାଗ ସୂଚନା ଅନୁଯାୟୀ, ଅଧାରୁ ଅଧିକ ଜିଲ୍ଲାରେ ନିଅଣ୍ଟିଆ ବର୍ଷା ହୋଇଛି । ୧ ଜୁନରୁ ୧୪ ଜୁଲାଇ ମଧ୍ୟରେ ୧୭ ଟି ଜିଲ୍ଲାରେ ସ୍ୱାଭାବିକଠାରୁ ୨୦ ପ୍ରତିଶତ କମ ବର୍ଷା ହୋଇଛି । ରାୟଗଡ଼ା, ଗଜପତି, ଗଞ୍ଜାମ, ନବରଙ୍ଗପୁର, ନୂଆପଡ଼ା, କଳାହାଣ୍ଡି, ବଲାଙ୍ଗୀର, ବରଗଡ଼, ସମ୍ବଲପୁର, ବୌଦ୍ଧ, ସୋନପୁର, ଅନୁଗୁଳ, ସୁନ୍ଦରଗଡ଼, ଯାଜପୁର, ଭଦ୍ରକ, ଝାରସୁଗୁଡ଼ା, ଦେବଗଡ଼, ମୟୂରଭଞ୍ଜ, କେନ୍ଦୁଝର ଓ କନ୍ଧମାଳ ଆଦି ଜିଲ୍ଲାରେ ବର୍ଷାର ପରିମାଣ ସ୍ୱାଭାବିକଠାରୁ କମ ରହିଛି ।
