ଟିକାକରଣ ଦେଢ଼ କୋଟି ଡୋଜ୍ ଟପିଛି
ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟରେ ଟିକାକରଣ ଦେଢ଼ କୋଟି ଡୋଜ୍ ଟପିଛି । ଜାନୁଆରି ୧୬ ରେ ଆରମ୍ଭ ହୋଇଥିଲା ରାଜ୍ୟରେ ଟିକାକରଣ । ଏହାର ୬ମାସ ପରେ ରାଜ୍ୟରେ କରୋନା ଟିକାକରଣ ଦେଢ଼ କୋଟି ଡୋଜ୍ ଟପିଛି। ଗୁରୁବାର ୨ଲକ୍ଷ ୩୬ହଜାର ୭୭୪ଜଣ ଟିକା ନେବା ପରେ ସମୁଦାୟ ଡୋଜ୍ ସଂଖ୍ୟା ୧କୋଟି ୫୦ଲକ୍ଷ ୧ହଜାର ୧୨୬କୁ ବୃଦ୍ଧି ପାଇଛି। ଶୁକ୍ରବାର ଯାଜପୁର ଓ କେନ୍ଦ୍ରାପଡ଼ାରେ ଟିକାକରଣ ବନ୍ଦ ରହିବ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି।
ଶୁକ୍ରବାର ୭୯୫ ଟିକାକରଣ ଅଧିବେଶନ ଅନୁଷ୍ଠିତ ହେବ। ରାଜ୍ୟରେ ଗୁରୁବାର ୧୧୫୮ ଟିକାକରଣ ଅଧିବେଶନରେ ୨ଲକ୍ଷ ୩୬ହଜାର ୭୭୪ଜଣ ଟିକା ନେଇଥିଲେ। ଏଥିରେ ୧୮-୪୪ବର୍ଗର ୧ଲକ୍ଷ ୭ହଜାର ୫୧୦ଜଣ ପ୍ରଥମ ଓ ୧୪,୫୪୨ଜଣ ଦ୍ବିତୀୟ ଡୋଜ୍ ନେଇଥିଲେ। ସେହିପରି ୪୫ବର୍ଷରୁ ଅଧିକ ୨୫,୩୨୬ଜଣ ପ୍ରଥମ ଓ ୮୫,୮୯୮ଜଣଙ୍କୁ ଦ୍ବିତୀୟ ଡୋଜ୍ ଟିକା ଦିଆଯାଇଥିଲା। ରାଜ୍ୟରେ ଏ ପର୍ଯ୍ୟନ୍ତ ୧୮-୪୪ବଗର ୨୨ ପ୍ରତିଶତ ଓ ୪୫ବର୍ଷରୁ ଅଧିକ ୫୫ ପ୍ରତିଶତ ପ୍ରଥମ ଡୋଜ୍ ଟିକା ନେଇ ସାରିଲେଣି। ସେହିପରି ରାଜ୍ୟରେ ୧୧ହଜାର ୧୩୫ଜଣ ଗର୍ଭବତୀ ଟିକା ନେଇ ସାରିଲେଣି।
