ଆଶ୍ରିତ ଉଜ୍ୱଳା ଗୃହରୁ ୫ ଅନ୍ତେବାସୀ ଫେରାର

ସୁବର୍ଣ୍ଣପୁର (ବଡ଼ ଖବର ବ୍ୟୁରୋ): ଅସହାୟଙ୍କୁ ସାହୟକ ହେବା ପାଇଁ ସରକାର ସୁଧାର ଗୃହ ଯୋଜନା କରିଛନ୍ତି । ଏହି ସୁଧାର ଗୃହରେ ଅସହାୟମାନଙ୍କ ପାଇଁ ରହିବା, ଖାଇବାର ବ୍ୟବସ୍ଥା ସହିତ ତାଙ୍କର ଭଳମନ୍ଦ ବୁଝିବା ପାଇଁ ମଧ୍ୟ ସୁବିଧା କରାଯାଇଛି । ସମସ୍ତ ସୁବିଧା ପାଇ ମଧ୍ୟ ଅନ୍ତେବାସୀମାନେ ସୁଧାରଗୃହରେ ନରହି ଲୁଚି ଫେରାର ହୋଇଯିବା ଘଟଣା ସାମ୍ନାକୁ ଆସିଛି । ଏଭଳି ଘଟଣା ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲାରେ । ସୁବର୍ଣ୍ଣପୁର ଜିଲ୍ଲାରେ ଥିବା ଆଶ୍ରିତ ଉଜ୍ୱଳା ଗୃହରୁ ୫ଜଣ ଅନ୍ତେବାସୀ ଫେରାର ହୋଇଯିବା ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।

ଗତ ୨୩ ତାରିଖ ରାତିରୁ ତରଭା ସ୍ଥିତ ଆଶ୍ରିତ ଉଜ୍ୱଳା ଗୃହରୁ ୫ଜଣ ଅନ୍ତେବାସୀ କୁଆଡେ ଫେରାର ହୋଇଯାଇଛନ୍ତି । ବର୍ତ୍ତମାନ ପର୍ଯ୍ୟନ୍ତ ତାଙ୍କର ଖୋଜ ଖବର ମିଳୁନାହିଁ । ଏନେଇ ଥାନାରେ ଏକ ମାମଲା ଦାୟର ହୋଇଛି । ଘଟଣାସ୍ଥଳରେ ତରଭା ପୋଲିସ ସହ ସୋନପୁର ଏସଡ଼ିପିଓ ଏବଂ ଅତିରିକ୍ତ ଆରକ୍ଷୀ ଅଧିକ୍ଷକ ପହଞ୍ଚି ତଦନ୍ତ ଚଳାଇଛନ୍ତି । ଅନ୍ୟପଟେ ସୁଧାର ଗୃହର ଦାୟିତ୍ୱରେ ଥିବା କବିତା ସେଠୀ ତଦନ୍ତ ସମୟରେ ସାମ୍ବାଦିକମାନଙ୍କୁ ସୁଧାର ଗୃହ ଭିତରକୁ ପଶିବାକୁ ବାରଣ କରିବା ସହ ଗେଟରେ ତାଲା ପକାଇ ଦେଇଥିଲେ । ତେବେ କାହିଁକି ସାମ୍ବାଦିକମାନଙ୍କୁ ମନା କଲେ ତାହା ବର୍ତ୍ତମାନ ପ୍ରଶ୍ନବାଚୀ ସୃଷ୍ଟି କରିଛି । ଅନ୍ୟପଟେ ଗୃହ ଦାୟିତ୍ ବରେ ଥିବା କବିତା ସେଠୀ କହିଛନ୍ତି ସେମାନେ ପଳେଇଲା ଲୋକ ପଳେଇଲେ । ଏଥିରେ କ’ଣ ଅସୁବିଧା ଅଛି । ଏହା ଏକ ସାଧାରଣ କଥା ।