ବୈତରଣୀରେ ବଢୁଛି ବନ୍ୟାଜଳ

ଆରଡ଼ି (ବଡ଼ ଖବର ବ୍ୟୁରୋ): ଲଘୁଚାପ ଜନିତ ଉପରମୁଣ୍ଡରେ ଲଗାଣବର୍ଷା ଯୋଗୁ ବୈତରଣୀ ନଦୀରେ ଆସିଛି ୨ୟ ବନ୍ୟାଜଳ। ଏବେ ବୈତରଣୀ ଉପରମୁଣ୍ଡରେ ବନ୍ୟାଜଳ ବିପଦ ସଂକେତ ଉପରେ ପ୍ରବାହିତ ହେଉଥିବାବେଳେ ତଳମୁଣ୍ଡରେ ଅର୍ଥାତ ଭଦ୍ରକ ଜିଲାର ସୀମାନ୍ତବର୍ତ୍ତୀ ଅଞ୍ଚଳ ଆରଡି, ଓଳଗ, ସୁନ୍ଦରପୁର , ନାନ୍ଦପୁର ଆଦି ଅଞ୍ଚଳ ଦେଇ ପ୍ରବାହିତ ହେଉଥିବା ବୈତରଣୀନଦୀର ବନ୍ୟାଜଳ ଦ୍ରୁତଗତିରେ ବୃଦ୍ଧି ପାଇବାରେ ଲାଗିଛି।

ଫଳରେ ବିଭିନ୍ନ ଏସକେପ ଓ ମାହାରା ଦେଇ ବନ୍ୟାଜଳ ଜନବସତି ଆଡକୁ ମାଡିବାରେ ଲାଗିଛି। ବୁଧବାର ସନ୍ଧ୍ୟା ସୁଧା ବୈତରଣୀନଦୀର ବନ୍ୟାଜଳ ବୃଦ୍ଧି ପାଇବା ଫଳରେ କୂଳ ଲଙ୍ଘି ଓଳଗ ପଞ୍ଚାୟତର ବୋଡକ ତଳସାହିରେ ବନ୍ୟାଜଳ ପ୍ରବେଶ କରିବାରୁ ୨୫ରୁ ଅଧିକ ଘର ଏବେ ଜଳବନ୍ଦୀ ହୋଇ ରହିଛି। ଫଳରେ ବସବାସ କରୁଥିବା ଲୋକମାନେ ଅଣ୍ଟାଏ ପାଣିରେ ପଶି ଯାତାୟତ କରୁଛନ୍ତି। ଅନେକ ସ୍ଥାନରେ ନଳକୂପ ବୁଡିଯାଇଥିବାରୁ ପିଇବାପାଣିର ସମସ୍ୟା ଦେଖାଦେଇଛି। ସେହିପରି ଶହଶହ ଏକର ଚାଷଜମିରେ ଲହଡି ଭାଙ୍ଗୁଛି ପାଣି।