ରାଜ୍ୟରେ କମୁଛି କରୋନା

ଭୁବନେଶ୍ୱର, (ବଡ଼ ଖବର ବ୍ୟୁରୋ), ୫/୧୦: ଆଜି ରାଜ୍ୟରେ କୋଭିଡ-୧୯ ସଂକ୍ରମିତଙ୍କ ସଂଖ୍ୟା ୨୬୧୭ରେ ରହିଛି । ଖୋର୍ଦ୍ଧା ଜିଲ୍ଲା ବିଶେଷ କରି ଭୁବନେଶ୍ୱରକୁ ବାଦ ଦେଲେ ରାଜ୍ୟର ପ୍ରାୟ ସବୁ ଜିଲ୍ଲାରେ କୋଭିଡ ସଂକ୍ରମଣ ନିୟନ୍ତ୍ରଣକୁ ଆସୁଛି ବୋଲି ରାଜ୍ୟ ସରକାର ଦାବି କରୁଛନ୍ତି ।

ଏପରିକି ସଂକ୍ରମଣରେ ଗମ୍ଭୀର ସ୍ଥିତିରେ ଥିବା କଟକ ଓ ପୁରୀ ଜିଲ୍ଲାରେ ବି ସଂକ୍ରମଣ ହାର ବେଶ କମିଛି । ଗତ ୨୪ଘଣ୍ଟା ମଧ୍ୟରେ ରାଜ୍ୟର ୧୦ଟି ଜିଲ୍ଲାରେ ସଂକ୍ରମିତଙ୍କ ସଂଖ୍ୟା ଶହେ ଉପରେ ରହିଛି । ଅନ୍ୟ ସବୁ ଜିଲ୍ଲାରେ ସଂକ୍ରମିତଙ୍କ ସଂଖ୍ୟା ଶହେରୁ ତଳକୁ ଖସି ଯାଇଛି ।

କେବଳ ସଂକ୍ରମିତଙ୍କ ସଂଖ୍ୟା କମିନାହିଁ, ରାଜ୍ୟରେ ଅଧିକ ସଂଖ୍ୟାରେ ରୋଗୀ ସଂକ୍ରମଣ ମୁକ୍ତ ହେଉଛନ୍ତି ବୋଲି ରାଜ୍ୟ ସ୍ୱାସ୍ଥ୍ୟ ବିଭାଗ ସୂଚନା ଦେଇଛି । ୨୪ଘଣ୍ଟାରେ ରାଜ୍ୟର ୪୧୦୮ଜଣ ସୁସ୍ଥ ହୋଇଛନ୍ତି । ଏପର୍ଯ୍ୟନ୍ତ ମୋଟ ୨ଲକ୍ଷ ୩୫ହଜାର ୩୩୦ ଜଣ ସଂକ୍ରମିତଙ୍କ ମଧ୍ୟରୁ ୨ଲକ୍ଷ ୨ହଜାର ୩୦୨ଜଣ ସଂକ୍ରମଣ ମୁକ୍ତ ହୋଇଛନ୍ତି ।

ରବିବାର ରାଜ୍ୟରେ ୩୩୨୬ଜଣ ସଂକ୍ରମିତ ହୋଇଥିବା ସ୍ୱାସ୍ଥ୍ୟ ବିଭାଗ ତଥ୍ୟ ଦେଇଥିବା ବେଳେ ତିନି ତାରିଖ ୩୦୫୩ଜଣ ସଂକ୍ରମିତ ଥିଲେ । ସେଦିନ କଟକ ଜିଲ୍ଳାର ସଂକ୍ରମିତଙ୍କ ସଂଖ୍ୟା ୨୫୬ ଥିଲା । ପୁରୀ ୧୨୭ ଥିଲା । ଖୋର୍ଦ୍ଧା ୫୬୧ ଥିଲା ।

ହେଲେ ଆଜି କଟକ ପୁରୀ ସମେତ ପ୍ରାୟ ସବୁ ଜିଲ୍ଲାରେ ସଂକ୍ରମିତଙ୍କ ସଂଖ୍ୟା କମିଥିବା ବେଳେ ଖୋର୍ଦ୍ଧା ଜିଲ୍ଲାରେ ସଂକ୍ରମଣ କମୁନାହିଁ । ଆଜି ବି ସଂକ୍ରମିତଙ୍କ ସଂଖ୍ୟା ୫ଶହ ଉପରେ ରହିଛି ।