ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ମହାପର୍ବ ଛଟକୁ ନେଇ ଦିଲ୍ଲୀ ବଜାର ବର୍ତ୍ତମାନ ସରଗରମ ହୋଇ ଉଠିଛି । ଅନେକ ରାଜ୍ୟରୁ ଲୋକମାନଙ୍କର ସମାଗମ ମଧ୍ୟ ରାଜଧାନୀରେ ବଢିବାରେ ଲାଗିଛି । ଏହାକୁ ଦୃଷ୍ଟିରେ ରଖି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗାଇଡଲାଇନ ମଧ୍ୟ ଜାରି କରିଛନ୍ତି । ଏହା ମଧ୍ୟରେ ମୁଖ୍ୟମନ୍ତ୍ରୀ ଉପରାଜ୍ୟପାଳ ଅନିଲ ବୈଜଲଙ୍କୁ ଚିଠି ଲେଖିଥିବାର କଥା ସାମ୍ନାକୁ ଆସିଛି । ବର୍ତ୍ତମାନ ଦିଲ୍ଲୀରେ କରୋନାସ୍ଥିତି ଭଲ ଅଛି । ତେଣୁ ଏହାକୁ ଦୃଷ୍ଟିରେ ରଖି ଦିଲ୍ଲୀରେ ଛଟ ପୂଜା କରିବାକୁ ଅନୁମତି ଦିଆଯିବା ଆବଶ୍ୟକ ବୋଲି କେଜ୍ରିୱାଲ ଏହି ଚିଠିରେ ଲେଖିଛନ୍ତି ।
ଅନ୍ୟପଟେ ଛଟ ପୂଜାକୁ ନେଇ ଦିଲ୍ଲୀରେ ରାଜନୀତି ସରଗରମ ହୋଇଉଠିଛି । କାହିଁକିନା କରୋନାକୁ ଦୃଷ୍ଟିରେ ରଖି ଦିଲ୍ଲୀର ସର୍ବସାଧାରଣ ସ୍ଥାନ, ଜଳଭଣ୍ଡାର ଏବଂ ନଦୀ କୂଳରେ ଏହି ପୂଜାକୁ କରିବା ପାଇଁ ବାରଣ କରିଛନ୍ତି । ହେଲେ ଏହି ନିଷ୍ପତ୍ତି ବିରୋଧରେ ବିଜେପି ଦିଲ୍ଲୀ ସରକାରଙ୍କୁ ଟାର୍ଗେଟ କରିଥିବାର ଦେଖିବାକୁ ମିଳିଛି ।
