୨୪ ରେ ଶଙ୍ଖ ଧରିବେ ପ୍ରଦୀପ !

ଭୁବନେଶ୍ଵର(ବଡ଼ ଖବର ବ୍ୟୁରୋ): ୨୪ ରେ ଶଙ୍ଖ ଧରି ପାରନ୍ତି ହାତ ଛାଡ଼ିଥିବା ନବରଙ୍ଗପୁରର ପୂର୍ବତନ ସାଂସଦ ପ୍ରଦୀପ ମାଝୀ। ନବରଙ୍ଗପୁରେ ଏକ ବିରାଟ ସମାବେଶରେ ନିଜ ଶତାଧିକ ସମର୍ଥକଙ୍କୁ ନେଇ ବିଜେଡିରେ ମିଶିବେ ବୋଲି ପ୍ଲାନ ହୋଇଥିବା ବିଶେଷ ସୂତ୍ରରୁ ଜଣା ପଡ଼ିଛି । ହେଲେ ଏଭଳି ଚର୍ଚ୍ଚାକୁ ନେଇ ପ୍ରଦୀପ ମାଝି କିଛି ପ୍ରତିକ୍ରିୟା ରଖିନାହାନ୍ତି । ବିଜେଡିରେ ସାମିଲ ହୋଇ ଆଗାମୀ ପଞ୍ଚାୟତ ନିର୍ବାଚନରେ ନିଜର ନୂଆ ରାଜନୈତିକ ଇନିଙ୍ଗସ୍ ଆରମ୍ଭ କରିବାକୁ ଯାଉଛନ୍ତି ପ୍ରଦୀପ।

ଏକଦା ସ୍ଵର୍ଗତ ବିଜୁ ପଟ୍ଟନାୟକଙ୍କ ଘନିଷ୍ଠ ଥିବା ପ୍ରଦୀପଙ୍କ ବାପା ଭଗବାନ ମାଝୀ ରାଜ୍ୟସଭା ସାଂସଦ ହୋଇଥିଲେ । ଆଉ କଂଗ୍ରେସରୁ ଲଗାତାର ଦୁଇ ଥର ହାରିବା ପରେ ପ୍ରଦୀପ ଏବେ ନିଜ ବାପାଙ୍କ ରାଜନୀତି ରାସ୍ତାରେ ଯାଇ ବିଜୁଙ୍କୁ ଆଦର୍ଶ କରି ଶଙ୍ଖ ଧରିବେ ବୋଲି ଚର୍ଚ୍ଚା ହେଉଛି। ବିଜେଡି ପାଓ୍ବାର କରିଡରରେ ମଧ୍ୟ ଏନେଇ ମାନସ ମନ୍ଥନ ସରିଛି। ଯଦି ପ୍ରଦୀପ ବିଜେଡିରେ ମିଶି ଆଗାମୀ ନିର୍ବାଚନରେ ନବରଙ୍ଗପୁରର ନେତୃତ୍ଵ ନିଅନ୍ତି ତେବେ ନବରଙ୍ଗପୁରରେ କଂଗ୍ରେସ ରସାତଳକୁ ଯିବାଟା ଥୟ।