ନଭେମ୍ବର ପରେ କ’ଣ ହେବ ମନରେଗା ଭାଗ୍ୟ?
ଭୁବନେଶ୍ୱର(ବଡ଼ ଖବର ବ୍ୟୁରୋ): ଗ୍ରାମାଞ୍ଚଳରେ ସବୁଠାରୁ ବଡ଼ ନିଯୁକ୍ତି ଯୋଜନା ହେଉଛି ମହାତ୍ମା ଗାନ୍ଧି ଜାତୀୟ ନିଶ୍ଚିତ କର୍ମ ଯୋଗାଣଯୋଜନା । କରୋନା ମହାମାରୀ ସମୟରେ ଯେବେ ଲୋକ ସେମାନଙ୍କ ରୋଜଗାର ଯୋଗାଇଥିଲା ସେବେ ଏହି ଯୋଜନା ମାଧ୍ୟମରେ ଲକ୍ଷ ଲକ୍ଷ ଲୋକଙ୍କ ରୋଜଗାରର ମାଧ୍ୟମ ପାଲଟିଥିଲା । କିନ୍ତୁ ବର୍ତ୍ତମାନ ଏହି ମନରେଗା ଯୋଜନା ବନ୍ଦ ହେବାର ଆଶଙ୍କା ଦେଖାଦେଇଛି । ଏହି ଯୋଜନା ମାଧ୍ୟମରେ ଲୋକଙ୍କୁ କାମ ଯୋଗାଇବା କାଠିକର ହେବ ।
କାରଣ ଏହାକୁ ଜାରି ରଖିବାକୁ ଆବଶ୍ୟକ ପଡ଼ୁଥିବା କେନ୍ଦ୍ରୀୟ ମଞ୍ଜୁରି ନ ଥିବାରୁ ଏଭଳି ସ୍ଥିତି ଉପୁଜୁଥିବା ଜଣାପଡ଼ିଛି । କେନ୍ଦ୍ର ସରକାର ଚଳିତ ଆର୍ଥିକ ବର୍ଷରେ ୧୪କୋଟି ଶ୍ରମ ଦିବସ ସୃଷ୍ଟି କରିବାକୁ ମଞ୍ଜୁରୀ ଦେଇଥିଲେ । ଯାହାକି ଏବେ ସରିଯିବାକୁ ବସିଲାଣି । ତେଣୁ ଗ୍ରାମ୍ୟ ଉନ୍ନୟନ ମନ୍ତ୍ରାଳୟ ଯଦି ଆଉ ମଞ୍ଜୁରି ନ ଦିଏ ତେବେ ଯୋଜନା କାର୍ଯ୍ୟକାରୀ କରିବା ସମ୍ଭବ ହେବନାହିଁ ।
ମନରେଗା ଯୋଜନାରେ ପ୍ରତ୍ୟେକ ପଞ୍ଜୀକୃତ ବ୍ୟକ୍ତିଙ୍କୁ ଅତି କମରେ ୧୦୦ ଦିନର କାମ ଯୋଗାଇବା ପାଇଁ ବ୍ୟବସ୍ଥା ଥିବାବେଳେ ରାଜ୍ୟକୁ ଆବଶ୍ୟକ ମୁତାବକ ମଞ୍ଜୁରି ମଳୁନି । ଚଳିତ ବର୍ଷ ପାଇଁ ମିଳିଥିବା ୧୪ କୋଟି ଶ୍ରମ ଦିବସ ମଧ୍ୟରୁ ସେପ୍ଟେମ୍ବର ଶେଷସୁଦ୍ଧା ୧୩କୋଟି ୩୫ଲକ୍ଷ ଶ୍ରମ ଦିବସ ସୃଷ୍ଟି କରାଯାଇ ପାରିଛି । ଅବଶିଷ୍ଟ ୬୫ଲକ୍ଷ ଶ୍ରମ ଦିବସ ଅକ୍ଟୋବର ସୁଦ୍ଧା ଶେଷ ହୋଇଯିବ ।
ନଭେମ୍ବରରେ ଯଦି ଆଉ ମଞ୍ଜୁରି ନ ମିଳିବ ତେବେ ଲୋକଙ୍କୁ ରୋଜଗାର ଯୋଗାଇବା ସମ୍ଭବ ହେବନି । ସରକାରଙ୍କ ପାଖରେ ଆସନ୍ତା ଜାନୁୟାରୀ ପର୍ଯ୍ୟନ୍ତ କର୍ମଯୋଗାଣ କରିବାର ବିଶେଷ ସୁଯୋଗ ରହିଛି । ଆଉ ପଞ୍ଚାୟତ ନିର୍ବାଚନ ପାଇଁ ଫେବୃୟାରୀ ଓ ମାର୍ଚ୍ଚ ମାସରେ ମନରେଗା ଯୋଜନା କାର୍ଯ୍ୟକାରୀ କରାଇବା କ୍ଷେତ୍ରରେ ଅନ୍ତରାୟ ହୋଇପାରେ । କାରଣ ବ୍ଲକ ଠାରୁ ପଞ୍ଚାୟତ ପର୍ଯ୍ୟନ୍ତ ନିର୍ବାଚନରେ ବ୍ୟସ୍ତ ରହିବା ଯୋଗୁଁ ଶ୍ରମ ଯୋଗାଣ କାର୍ଯ୍ୟକ୍ରମରେ ସମନ୍ୱୟ ରକ୍ଷା କରିବା ଅଧିକାରୀଙ୍କ ପକ୍ଷେ ସମ୍ଭବ ହୋଇ ନପାରେ ।
ଗତ ଆର୍ଥିକ ବର୍ଷରେ ରାଜ୍ୟ ସରକାର ୨୦ କୋଟି ୫୦ଲକ୍ଷ ଶ୍ରମ ଦିବସ ସୃଷ୍ଟି କରିଥିବା ବେଳେ ଏହା ଅପେକ୍ଷା ଚଳିତ ବର୍ଷ ଅଧିକ ମଞ୍ଜୁରି ମିଳିବ ବୋଲି ବରିଷ୍ଠ ଅଧିକାରୀ ମାନେ ଆଶା କରିଥିଲେ । କିନ୍ତୁ ପ୍ରଥମ ପର୍ଯ୍ୟାୟରେ ୧୪ କୋଟି ଶ୍ରମ ଦିବସ ସୃଷ୍ଟି ପାଇଁ ମଞ୍ଜୁରି ମିଳିଲା । ରାଜ୍ୟରେ ଯେତିକି ଶ୍ରମ ଶକ୍ତି ରହିଛି ଏହା ସୁରୁଖୁରୁରେ ୨୫ କୋଟି ଶ୍ରମ ଦିବସ ସଅଷ୍ଟି କରିପାରିବ ବୋଲି ଅଧିକାରୀ ମାନେ କହିଛନ୍ତି । ତେବେ ବର୍ତ୍ତମାନ ଗ୍ରାମ୍ୟ ଉନ୍ନୟନ ମନ୍ତ୍ରାଳୟର ମଞ୍ଜୁର ନଥିବାରୁ କାର୍ମ୍ୟକ୍ରମ ରୂପାୟନ ଦାୟିତ୍ୱରେ ଥିବା ଅଫିସର ଚିନ୍ତାରେ ପଡ଼ିଛନ୍ତି ।
