ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ପାକିସ୍ତାନରେ ଆର୍ଥିକ ସଙ୍କଟ ପରେ ଏବେ ଦେଖାଦେଇଛି ରାଜନୈତିକ ସଙ୍କଟ । ପାକିସ୍ତାନରେ ସେହବାଜ ସରକାରଙ୍କ ପତନ ହେବା ନେଇ ଆକଳନ କରାଯାଇଛି । ସେହବାଜ ସରିଫଙ୍କ ପରିବାରରେ ସୃଷ୍ଟି ହୋଇଛି କନ୍ଦଳ । ସରିଫ ପରିବାରିକ ଦଳ ଅର୍ଥାତ କ୍ଷମତାସୀନ ପିଏମ୍ଏଲ୍ ଦଳରେ ପୁଣିଥରେ ବଡ଼ ଧରଣର ରାଜନୈତିକ ସଂକଟ ସୃଷ୍ଟି ହୋଇଛି । ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଝିଅ ମରିୟମ ନୱାଜ ନିଜ ଦାଦା ପ୍ରଧାନମନ୍ତ୍ରୀ ସେହବାଜ ସରିଫଙ୍କ ବିରୋଧରେ ମୋର୍ଚ୍ଚା ଖୋଲିଛନ୍ତି। ବର୍ତ୍ତମାନର ସରକାରଠାରୁ ନିଜକୁ ଅଲଗା କରିବାକୁ ମରିୟମ ନୱାଜ ଘୋଷଣା କରିଛନ୍ତି। ସେ କହିଛନ୍ତି ବର୍ତ୍ତମାନର ସରକାର ପିଏମଏଲର ନୁହଁନ୍ତି। ନୱାଜ ସରିଫ ପାକିସ୍ତାନରେ ଥିବାବେଳେ ଆମେ ସରକାର ଗଢ଼ିବୁ।
ପାକିସ୍ତାନର ଗଣମାଧ୍ୟମରେ ଏକ ବଡ଼ ଆଲୋଚନା ହେଉଛି ନୱାଜ ସରିଫଙ୍କ ଜ୍ୱାଇଁ ଅର୍ଥାତ ମରିୟମଙ୍କ ସ୍ୱାମୀ ଅବସର ପ୍ରାପ୍ତ କ୍ୟାପଟେନ ମୋହମ୍ମଦ ସଫଦାର ପାର୍ଟିରେ ଏନେଇ ଉପଯୁକ୍ତ ପରିବେଶ ସୃଷ୍ଟି କରୁଛନ୍ତି। ସେହବାଜ ସରିଫଙ୍କୁ ବଦଳାଇବା ଏବଂ ତାଙ୍କ ପତ୍ନୀ ମରିୟମଙ୍କୁ ପାକିସ୍ତାନର ପ୍ରଧାନମନ୍ତ୍ରୀ କରିବା ପାଇଁ ସଫଦର ଏକ ଅଭିଯାନ ଚଳାଉଛନ୍ତି। ସେପଟେ ପାକିସ୍ତାନର ପ୍ରଥମରୁ ଦରଦାମ୍ ବୃଦ୍ଧିକୁ ନେଇ ଜନଅସନ୍ତୋଷ ଲାଗି ରହିଛି । ଏପରି ସ୍ଥିତିରେ ସେହବାଜ୍ ସରିଫ୍ ସରକାରଙ୍କ ପାଇଁ ଏବେ ମାରିୟମ୍ଙ୍କ ବିଦ୍ରୋହ ଡବଲ୍ ଚାଲେଞ୍ଜ ସୃଷ୍ଟି କରିଛି ।
