ଷ୍ଟେଜ ଛାଡି ପଳାଇଲେ ପପୁ ପମପମ୍

ଗଞ୍ଜାମ(ବଡ଼ ଖବର ବ୍ୟୁରୋ): ହାସ୍ୟ ଅଭିନେତା ପପୁ ପମପମଙ୍କ ମଞ୍ଚ ଉପରକୁ ପଥର ମାଡ, କାର୍ୟ୍ୟକ୍ରମ ଅଧାରୁ ଛାଡି ପଳାଇଲେ ପପୁ । ଏଭଳି ଏକ ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଚିକିଟି ବ୍ଲକର ସୁରଳ ଗ୍ରାମରେ । ସୁରଳ ଗ୍ରାମରେ ଶିବରାତ୍ରି ଅବସରରେ ସାଂସ୍କୃତିକ କାର୍ୟ୍ୟକ୍ରମ ଚାଲିଥିଲା । କାର୍ୟ୍ୟକ୍ରମର ଆରମ୍ଭ ହେବାର କିଛି ସମୟ ପରେ ପପୁ ପମପମ ମଞ୍ଚ ଉପରକୁ ଆସିଥିଲେ ।

ଏହି ସମୟରେ ହଠାତ୍ ମଞ୍ଚ ଉପରକୁ ପଥର ମାଡ ହୋଇଥିଲା । ପଥର ପପୁଙ୍କ କାନ୍ଧର କିଛି ଇଞ୍ଚ ବ୍ୟବଧାନରେ ଯାଇ ପଛପଟେ ଥିବା ଡିଜିଟାଲ ଡିସପ୍ଲେ ବୋର୍ଡକୁ ବାଜିବାରୁ ତାହା ଭାଙ୍ଗି ଯାଇଥିଲା । ପରେ ଆଉ ଏକ ପଥର ମଞ୍ଚ ଉପରେ ଥିବା ଅନ୍ୟ ଜଣେ ଯୁବକଙ୍କୁ ବାଜିଥିଲା । ଫଳରେ ସୁରକ୍ଷା ଦୃଷ୍ଟିରୁ ପପୁ ପମପମ କାର୍ୟ୍ୟକ୍ରମ ଅଧାରୁ ପଳାଇଥିଲେ । ତେବେ କେଉଁ କାରଣ ଯୋଗୁଁ ପଥର ମାଡ ହୋଇଥିଲା ତାହା ସ୍ପଷ୍ଟ ହୋଇନାହିଁ । ଆଉ ଏନେଇ ସ୍ଥାନୀୟ ଥାନାରେ ମଧ୍ୟ କିଛି ଅଭିଯୋଗ ହୋଇନଥିବା ଜଣାପଡିଛି ।