ଭୁବନେଶ୍ୱର (ବଡ଼ ଖବର ବ୍ୟୁରୋ): କାମଧନ୍ଦା ଅଭାବରୁ ଓଡ଼ିଶାରୁ ଶହ ଶହ ଶ୍ରମିକ ରାଜ୍ୟ ବାହାରକୁ ଯାଉଛନ୍ତି । ପ୍ରତିଦିନ ଦାଦନଙ୍କ କରୁଣ କାହାଣୀ ଗଣମାଧ୍ୟମର ଶିରୋନାମା ମଣ୍ଡନ କରୁଛି । ଏହାସତ୍ତ୍ୱେ ରାଜ୍ୟ ସରକାର କହୁଛନ୍ତି ୧୯ ଜିଲ୍ଲା ଦାଦନ ମୁକ୍ତ । ବୁଝିବାକୁ ଗଲେ ୧୯ ଜିଲ୍ଲାର କୌଣସି ଲୋକ କାମଧନ୍ଦା ଅନ୍ୱେଷଣରେ ରାଜ୍ୟ ବାହାରକୁ ଯାଉନାହାନ୍ତି । କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତିଙ୍କ ପ୍ରଶ୍ନର ଉତ୍ତରରେ ଶ୍ରମ ଓ କର୍ମଚାରୀ ରାଜ୍ୟ ବୀମା ମନ୍ତ୍ରୀ ଶ୍ରୀକାନ୍ତ ସାହୁ ବିଧାନସଭାରେ କହିଛନ୍ତି, ୨୦୨୨ ରେ ୩୨୮ ଜଣ ଠିକାଦାରଙ୍କୁ ଲାଇସେନ୍ସ ଦିଆଯାଇଛି ।
ସେମାନେ ଅନ୍ୟ ରାଜ୍ୟକୁ ଶ୍ରମିକ ଚାଲାଣ କରିପାରିବେ । ଏହି ଠିକାଦାରମାନେ ୧୯ହଜାର ୨୮୪ ଜଣ ଶ୍ରମିକଙ୍କୁ ନିୟୋଜିତ କରିପାରିବେ । କୋରାପୁଟ, ରାୟଗଡ଼ା, ନବରଙ୍ଗପୁର ଓ ମାଲକାନାଗିରି ଜିଲ୍ଲାରେ ଜଣେ ମାତ୍ର ଠିକାଦାରଙ୍କୁ ୯୯ ଜଣ ପ୍ରବାସୀ ଶ୍ରମିକ ନିୟୋଜନ ପାଇଁ ଲାଇସେନ୍ସ ପ୍ରଦାନ କରାଯାଇଛି । ସରକାରୀ ରିପୋର୍ଟ ଅନୁସାରେ ଅନୁଗୁଳ ଜିଲ୍ଲାରେ ଲାଇସେନ୍ସ ପ୍ରାପ୍ତ ଠିକାଦାର ନଥିବା ବେଳେ କେହିହେଲେ ଦାଦନ ଯାଉନାହାନ୍ତି । ସେହିପରି ବାଲେଶ୍ୱର, ଭଦ୍ରକ, ବୌଦ୍ଧ, ଦେବଗଡ଼, ଜଗତସିଂହପୁର, ଯାଜପୁର, କନ୍ଧମାଳ, କେନ୍ଦ୍ରାପଡ଼ା, କୋରାପୁଟ, ମାଲକାନଗିରି, ମୟୂରଭଞ୍ଜ, ନୟାଗଡ଼, ରାୟଗଡ଼ା, ସୁବର୍ଣ୍ଣପୁର, ସୁନ୍ଦରଗଡ଼ ଜିଲ୍ଲାରେ କୌଣସି ଲାଇସେନ୍ସ ପ୍ରାପ୍ତ ଠିକାଦାର ନାହାନ୍ତି କି କୌଣସି ଲୋକ ଦାଦନ ଯାଉନାହାନ୍ତି ।
ବରଗଡ଼ ଜିଲ୍ଲାରେ ୩ ଜଣ ଲାଇସେନ୍ସ ପ୍ରାପ୍ତ ଠିକାଦାର ଅଛନ୍ତି । ଏହି ଜିଲ୍ଲାରୁ ୨୫୦ ଜଣ ଦାଦନ ଯାଇଛନ୍ତି । ବଲାଙ୍ଗିରରେ ୨୨୯ ଠିକାଦାର ଥିବା ବେଳେ ୧୩ହଜାର ୮୪୩ ଶ୍ରମିକ ଦାଦନ ଯାଇଛନ୍ତି । କଟକରେ ୪ ଠିକାଦାର ୬୭ ଶ୍ରମିକ, ଢେଙ୍କାନାଳ ୨ ଠିକାଦାର ୪୦ ଶ୍ରମିକ, ଗଜପତି ୧ ଠିକାଦାର ୧୦ ଶ୍ରମିକ, ଗଞ୍ଜାମ ୧୯ ଠିକାଦର ୬୫୪ ଶ୍ରମିକ, ଝାରସୁଗୁଡ଼ ୯ ଠିକାଦର ୬୫୫ ଶ୍ରମିକ, କଳାହାଣ୍ଡି ୩ ଠିକାଦାର ୧୨୭ ଶ୍ରମିକ, କେନ୍ଦୁଝର ୧ ଠିକାଦା ର ୫୦ ଶ୍ରମିକ, ଖୋର୍ଦ୍ଧା ୧୦ ଠିକାଦାର ୧୯୫ ଶ୍ରମିକ, ନବରଙ୍ଗପୁର ୧ଠିକାଦାର ୯୯ ଶ୍ରମିକ, ନୂଆପଡ଼ା ୪୦ ଠିକାଦାର ୩ହଜାର ୬୬ ଶ୍ରମିକ, ପୁରୀ ୨ ଠିକାଦାର ୧୦୦ ଶ୍ରମିକ, ସମ୍ବଲପୁରରେ ୪ ଠିକାଦାରଙ୍କୁ ଲାଇସେନ୍ସ ଦିଆଯାଇଥିବା ବେଳେ ୧୨୮ ଜଣ ଶ୍ରମିକ ଦାଦନ ଯାଇଛନ୍ତି ।
