୧୯୯୩ ଆଜିର ଦିନ, ମୁମ୍ବାଇ ପାଇଁ ଥିଲା ବ୍ଲାକ ଫ୍ରାଇଡେ

ମୁମ୍ବାଇ (ବଡ଼ ଖବର ବ୍ୟୁରୋ):  ମାର୍ଚ୍ଚ ୧୨, ୧୯୯୩ । ମୁମ୍ବାଇ ପାଇଁ ଥିଲା ବ୍ଲାକ ଫ୍ରାଇଡେ । ବମ୍ବେ ଷ୍ଟକ ଏକ୍ସଚେଞ୍ଜରେ ପ୍ରତିଦିନ ଭଳି ସାଧାରଣ ଭାବେ କାମ ଚାଲିଥିଲା । ଦିନ ପ୍ରାୟ ୧ଟା ୩୦ । ଏକ୍ସଚେଞ୍ଜର ୨୮ ମହଲା ବିଲଡିଂର ବେସମେଣ୍ଟରେ ଶୁଭିଲା ବିସ୍ଫୋରଣର ଶଦ୍ଦ । ଆଉ ଦୋହୋଲି ଯାଇଥିଲା ସମ୍ପୂର୍ଣ୍ଣ ବିଲଡିଂ ।ଚାଲିଯାଇଥିଲା ୫୦ ଲୋକଙ୍କ ଜୀବନ । ଏହା ଥିଲା ପ୍ରଥମ ଝଟକା । ଅଧଘଣ୍ଟା ପରେ ଦ୍ୱିତୀୟ ବିସ୍ଫୋରଣ । ଆଉ ଏହି ସିସ୍ଫୋରଣ ହୋଇଥିଲା ଏକ କାରରେ । ଏହା ପରେ ଗୋଟିଏ ପରେ ଗୋଟିଏ ବିସ୍ଫୋରଣ ଆରମ୍ଭ ହୋଇଯାଇଥିଲା ।

ସମ୍ପୂର୍ଣ୍ଣ ମୁମ୍ବାଇରେ ୧୨ଟି ସ୍ଥାନରେ ୧୩ ବିସ୍ଫୋରଣ ହୋଇଥିଲା । ଏହି ସିରିଏଲ ବିସ୍ଫୋରଣରେ ୨୫୭ ଲୋକଙ୍କ ମୃତ୍ୟୁ ହୋଇଥିବା ବେଳେ ୭୧୩ ଆହତ ହୋଇଥିଲେ । ଆଜି ବି ମୁମ୍ବାଇବାସୀଙ୍କ ମନରେ ସେଦିନର ଘଟଣା ତାଜା ହୋଇ ରହିଛି । ଏହି ବିସ୍ଫୋରଣ ମୁମ୍ବାଇରେ ହୋଇଥିବା ଦଙ୍ଗାର କିଛି ସମୟ ପରେ ହୋଇଥିବାରୁ ଏହା ଦଙ୍ଗାର ପ୍ରତିଶୋଧ ବୋଲି କୁହାଯାଇଥିଲା । ଏହି ସିରିଏଲ ବିସ୍ଫୋରଣରେ ମୁମ୍ବାଇ ସମ୍ପୂର୍ଣ୍ଣ ଦୋହଲି ଯାଇଥିଲା । ପୋଲିସ କହିଥିଲା ଏହି ବିସ୍ଫୋରଣ ଭାରତ ବାହାରେ ଥିବା ଆତଙ୍କବାଦୀ ଦାଉଦ ଇବ୍ରାହିମ କରାଇଥିଲେ ।

ସମସ୍ତ ଯୋଜନା ଟାଇଗର ମେମନ କରିଥିଲେ । ହେଲେ ଏମାନଙ୍କୁ ଆଜି ପର୍ଯ୍ୟନ୍ତ ଧରା ଯାଇନାହିଁ । ଏହି ମାମଲାରେ ତଳ କୋର୍ଟ ୧୨ ଅଭିଯୁକ୍ତଙ୍କୁ ଫାଶି ଦଣ୍ଡାଦେଶ ଦେଇଛନ୍ତି । ଏଥିରେ ୟାକୁବ ମେମନ ବି ଥିଲେ, ଯାହାଙ୍କୁ ୨୦୧୫ରେ ଫାଶି ଦିଆଯାଇଥିଲା । ୟାକୁବ ମେମନ ମୁଖ୍ୟ ଅଭିଯୁକ୍ତ ଟାଇଗରର ଭାଇ ଥିଲେ । ଏହି ବିସ୍ଫୋରଣରେ ଯେତେବେଳେ ବଲିଉଡ ଅଭିନେତା ସଞ୍ଜୟ ଦତ୍ତଙ୍କ ନାମ ସାମ୍ନାକୁ ଆସିଥିଲା, ସେତେବେଳେ ଲୋକେ ବିଶ୍ୱାସ କରିପାରି ନ ଥିଲେ । ସଞ୍ଜୟ ଦତ୍ତଙ୍କୁ ୨୦୦୬ରେ ମୁମ୍ବାଇର ଟାଡା କୋର୍ଟ ଏକେ-୫୬ ରଖିଥିବା ଅପରାଧରେ ଦୋଷୀ ସାବ୍ୟସ୍ତ କରିଥିଲେ, ହେଲେ ଅନ୍ୟ ଅଭିଯୁକ୍ତମାନେ ଖଲାସ ହୋଇଯାଇଥିଲେ ।