ଅସ୍ତ୍ରଶସ୍ତ୍ର କିଣିବାରେ ଭାରତ ୧ନଂ

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଅସ୍ତ୍ରଶସ୍ତ୍ର କିଣାରେ ବିଶ୍ୱର ସବୁଠାରୁ ଆଗରେ ରହିଛି ଭାରତ । ଭାରତୀୟ ସେନାକୁ ଅଧିକ ଶକ୍ତିଶାଳୀ କରିବା କ୍ଷେତ୍ରରେ ଚେଷ୍ଟା ଜାରି ରଖିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବିଭିନ୍ନ କ୍ଷେତ୍ରରେ ସେନାକୁ ଅପଗ୍ରେଡ କରିବା ସହ ବିଦେଶରୁ ମିସାଇଲ ଭଳି ଅନେକ ଅତ୍ୟାଧୁନିକ ଅସ୍ତ୍ର-ଶସ୍ତ୍ର କିଣିଛି ଭାରତ । ତେବେ ଏହି କ୍ଷେତ୍ରରେ ବର୍ତ୍ତମାନ ଟପ୍ ଲିଷ୍ଟରେ ପହଞ୍ଚିଛି ଭାରତ । ଷ୍ଟକହୋମ ସ୍ଥିତ ଥିଙ୍କ ଟ୍ୟାଙ୍କ ‘ସିପରି’ ପକ୍ଷରୁ ଜାରି କରାଯାଇଥିବା ଏକ ରିପୋର୍ଟରୁ ଏହି ସୂଚନା ମିଳିଛି।

ଏହି ରିପୋର୍ଟ ଅନୁସାରେ ୨୦୧୩-୨୦୧୭ ଏବଂ ୨୦୧୮-୨୦୨୨ ମଧ୍ୟରେ ଅସ୍ତ୍ରଶସ୍ତ୍ର କିଣିବାରେ ୧୧ ପ୍ରତିଶତ ତଳକୁ ଖସିଥିଲେ ବି ନମ୍ବର ୱାନରେ ରହିଛି ଭାରତ। ତେବେ ଋଷ ଆକ୍ରମଣ ଯୋଗୁଁ ଆମେରିକା ଏବଂ ୟୁରୋପରୁ ମିଳିଥିବା ସୈନ୍ୟ ସହାୟତା ପରେ ୟୁକ୍ରେନ ୨୦୨୨ରେ ସର୍ବାଧିକ ଅସ୍ତ୍ରଶସ୍ତ୍ର ଆମଦାନୀ କରିଛି । ଏହା ସହିତ ବିଶ୍ୱର ତୃତୀୟ ସ୍ଥାନରେ ପହଞ୍ଚିଛି ୟୁକ୍ରେନ । ବିଶ୍ୱର ସମସ୍ତ ଦେଶରେ ଗତବର୍ଷ ହତିଆର ଆମଦାନୀ ପରିମାଣରେ ହ୍ରାସ ଦେଖିବାକୁ ମିଳିଛି । ତେବେ ଋଷ ସହ ଉତ୍ତେଜନା ବୃଦ୍ଧ ହେଉଥିବା କାରଣରୁ ୟୁରୋପର ଦେଶମାନେ ଅସ୍ତ୍ର-ଶସ୍ତ୍ର କିଣିଛନ୍ତି ।

ତେବେ ୨୦୧୮-୨୨ ଭିତରେ ସବୁଠୁ ଅଧିକ ଅସ୍ତ୍ରଶସ୍ତ୍ର କିଣିଥିବା ଦେଶଗୁଡିକ ମଧ୍ୟରେ ଏକ ନମ୍ବରରେ ରହିଛି ଭାରତ । ଏହାପରେ ସାଉଦି ଆରବ, କତର, ଅଷ୍ଟ୍ରେଲିଆ ଏବଂ ଚୀନ ସାମିଲ ରହିଛନ୍ତି । ଅନ୍ୟପଟେ ଅସ୍ତ୍ରଶସ୍ତ୍ର ରପ୍ତାନୀ କରିବା ତାଲିକାରେ ଆମେରିକା, ଋଷ, ଫ୍ରାନ୍ସ, ଚୀନ ଏବଂ ଜର୍ମାନୀ ସ୍ଥାନ ପାଇଛନ୍ତି । ଅନ୍ୟ ପକ୍ଷରେ ପଡୋଶୀ ରାଷ୍ଟ୍ର ପାକିସ୍ତାନ ଏହି ସମୟ ମଧ୍ୟରେ ୧୪ ପ୍ରତିଶତ ଅଧିକ ଅସ୍ତ୍ରଶସ୍ତ୍ର ଆମଦାନୀ କରିଛି । ଏହା ସହିତ ଅସ୍ତ୍ରଶସ୍ତ୍ର ଆମଦାନୀ ତାଲିକାର ଅଷ୍ଟମ ସ୍ତାନରେ ରହିଛି ପାକିସ୍ତାନ ।