ପୁରୀରେ ଗର୍ଜୁଛି ଡ୍ରାଇଭର ସଙ୍ଘ
ପୁରୀ(ବଡ଼ ଖବର ବ୍ୟୁରୋ): ପୁରୀରେ ଗର୍ଜୁଛି ଡ୍ରାଇଭର ସଙ୍ଘ ।ଅଲ୍ ଓଡ଼ିଶା ଡ୍ରାଇଭର ମହାସଂଘର ଷ୍ଟିଅରିଂ ଛାଡ଼ ଆନ୍ଦୋଳନ ଡାକରାରେ ସାମିଲ ହୋଇଛନ୍ତି ପୁରୀର ଶତାଧିକ ଡ୍ରାଇଭର । ପୁରୀର ବିଭିନ୍ନ ପ୍ରବେଶ ପଥ ଯଥା ହରେକୃଷ୍ଣ ପୁର ଛକ,ମଙ୍ଗଳାଘାଟ ଛକ,ଭୂଦାନ ଛକରେ ଶତାଧିକ ସଂଖ୍ୟକ ଡ୍ରାଇଭର ଏକାଠି ହୋଇ ୧୦ ଦଫା ନେଇ ରାଜ୍ୟ ସରକାରଙ୍କ ବିରୋଧରେ ନାରା ଦେବା ସହ ଶହ ଶହ ସଂଖ୍ୟକ ଡ୍ରାଇଭର ପିକେଟିଂ କରିଛନ୍ତି। ବାରମ୍ବାର ଆନ୍ଦୋଳନ ଓ ଆନ୍ଦୋଳନ କୁ ପ୍ରଶମିତ କରିବା ପାଇଁ ରାଜ୍ୟ ସରକାରଙ୍କ ପ୍ରତିଶ୍ରୁତି ବିଫଳ ହୋଇଥିବା ବେଳେ ଏଥର କିନ୍ତୁ ନଛୋଡବନ୍ଧା ସଙ୍ଘ।
ଦାବି ପୂରଣ ନହେବା ଯାଏଁ ରାଜରାସ୍ତାରେ ଅନିର୍ଦ୍ଦିଷ୍ଟ କାଳ ପର୍ୟ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଦମ୍ଭକ୍ତି ପ୍ରକାଶ କରି କହିଛନ୍ତି ସଂଘର ସଦସ୍ୟ ।ସେପଟେ ଲୋକଙ୍କ ଆବଶ୍ୟକତା ଦୃଷ୍ଟିରେ ରଖି ପ୍ରାଇଭେଟ ନମ୍ବର ଗାଡି ଗୁଡିକୁ ନ ଅଟକାଇ ସଙ୍ଘ ଛାଡି ଦେଉଥିବା ବେଳେ ଆମ୍ବୁଲାନ୍ସ,ପୋଲିସ,ସ୍କୁଲ,ଇତ୍ୟାଦି ଜରୁରୀକାଳୀନ ଗାଡିକୁ ମଧ୍ୟ ଛାଡିଦିଆଯାଉଛି ।ଏବଂ ହଳଦିଆ ନମ୍ବର ଥିବା ମାଲବାହୀ ଗାଡି ଗୁଡିକୁ କୌଣସି ମତେ ଛାଡି ଦିଆଯାଇନାହିଁ ।ମୋଟାମୋଟି ଭାବରେ ପୁରୀରେ ଷ୍ଟିଅରିଂ ଛାଡ଼ ଆନ୍ଦୋଳନରେ ରାଜ୍ୟ ସରକାରଙ୍କ ବିରୋଧରେ ଦମ ଦେଖାଇଛି ସଙ୍ଘ ।
