ସାତକୋଶିଆ ଜଙ୍ଗଲରେ ହାତୀ ମୃତ

ଅନୁଗୁଳ(ବଡ଼ ଖବର ବ୍ୟୁରୋ): ଅନୁଗୁଳ ଜିଲ୍ଲା ସାତକୋଶିଆ ଅଭୟାରଣ୍ୟରେ ହାତୀ ଛୁଆ ମୃତଦେହ ଉଦ୍ଧାର । ମିଳିଥିବା ସୂଚନା ମୁତାବକ ସାତକୋଶିଆ ବନଖଣ୍ଡ ପମ୍ପାସର ରେଞ୍ଜ ତରଭା ଜଙ୍ଗଲରୁ ହାତୀ ଛୁଆର ମୃତ ଦେହ ଉଦ୍ଧାର କରିଛି ବନବିଭାଗ । ମୃତ ହାତୀ ଛୁଆରର ବୟସ ୮ବର୍ଷ ହେବ ବୋଲି ଅନୁମାନ କରାଯାଉଛି । ବନ ବିଭାଗର ଏକ ଟିମ ତରଭା ଜଙ୍ଗଲରେ ପାଟ୍ରୋଲିଂ କରୁଥିବା ବେଳେ ମୃତ ଦେହକୁ ଠାବ କରିଥିଲେ ।

ଗୋଟେ ସପ୍ତାହରୁ ଅଧିକ ଦିନ ହେବ ମୃତ ହୋଇଥିବା ବେଳେ ଶରୀରଟି ସମ୍ପୂର୍ଣ୍ଣ ପଚି ନଷ୍ଟ ହୋଇଯାଇଛି । ତେବେ ହାତୀ ଛୁଆର କେଉଁ କାରଣରୁ ମୃତ୍ୟୁ ହୋଇଛି ତାହା ସ୍ପଷ୍ଟ ହୋଇନଥିବା ବେଳେ ଚମଡା ଓ ହାଡ଼ ବନବିଭାଗ ଜବତ କରିଥିବା ଜଣାପଡ଼ିଛି । ଶବ ବ୍ୟବଚ୍ଛେଦ ପାଇଁ ହାଡ଼ ଓ ଖପୁରୀକୁ ଓୟୁଏଟିକୁ ପଠାଯାଇଛି । ବ୍ୟବଚ୍ଛେଦ ରିପୋର୍ଟ ଆସିଲା ପରେ ମୃତ୍ୟୁର କାରଣ ଜଣାପଡିବ ବୋଲି ବିଭାଗ ପକ୍ଷରୁ ସୂଚନା ମିଳିଛି ।