ଭୁବନେଶ୍ୱର(ବଡ଼ ଖବର ବ୍ୟୁରୋ): ଜାଲ ସାର୍ଟିଫିକେଟ ପ୍ରସଙ୍ଗରେ କମ୍ପିଲା ଗୃହ । ବିରୋଧୀ କଂଗ୍ରେସ ଓ ବିଜେପି ସରକାରଙ୍କୁ ଘେରିଥିବା ବେଳେ ଉତ୍ତର ଦେଇଛି ବିଜେଡି । ଶୂନ୍ୟକାଳରେ ଜାଲ ସାର୍ଟିଫିକେଟ ପ୍ରସଙ୍ଗକୁ ନେଇ କମ୍ପିଲା ବିଧାନସଭା । ବିରୋଧୀ ଗୃହରେ ଦେଖାଇଥିଲେ ଫଟୋ । କଂଗ୍ରେସ ବିଧାୟକ ଦଳ ନେତା କହିଲେ ମୁଖ୍ୟ ଅଭିଯୁକ୍ତଙ୍କ ସହ ଜଣେ ପୂର୍ବତନ ମନ୍ତ୍ରୀ ଏବଂ ଗୃହ ରାଷ୍ଟ୍ରମନ୍ତ୍ରୀଙ୍କ ଫଟୋ ଭାଇରାଲ ହେଉଛି । ଅଭିଯୁକ୍ତ ସରକାରୀ କ୍ୱାଟର୍ସକୁ ଜବରଦଖଲ କରି ରଖିଛନ୍ତି । ସରକାର କ’ଣ ପଦକ୍ଷେପ ନେଇଛନ୍ତି ବୋଲି ସେ ପ୍ରଶ୍ନ କରିଥିଲେ । ତେଣେ ବିଜେପି କହିଛି ଜାଲ ସାର୍ଟିଫିକେଟ ରାକେଟ ବଲାଙ୍ଗୀରରେ ଧରାପଡିଛି । ତା’ସହିତ ବଣିକ ଇନଷ୍ଟିଚିୟୁଟର କ’ଣ ସମ୍ପର୍କ ରହିଛି । ଗୃହରେ ଏ ନେଇ ସରକାର ଉତ୍ତର ରଖନ୍ତୁ ବୋଲି ବିରୋଧୀ ଦଳ ନେତା ଦାବି କରିଥିଲେ ।
ବିଜେଡି ମଧ୍ୟ ଗୃହରେ ଦେଖାଇଥିଲା ବିରୋଧୀଙ୍କ ସହ ଅଭିଯୁକ୍ତର ଫଟୋ ଥିବା ପୋଷ୍ଟର । ବିଜେଡି ସଦସ୍ୟ ଅରୁଣ ସାହୁ କହିଛନ୍ତି ନିରପେକ୍ଷ ତଦନ୍ତ କରି ଦୋଷୀଙ୍କୁ ଦଣ୍ଡ ଦିଆଯିବ । ଯିଏ ଦୋଷୀ ସିଏ ନିଶ୍ଚିତ ଦଣ୍ଡ ପାଇବ । ଦିଲ୍ଲୀରେ ବିରୋଧ ଓଡ଼ିଶାରେ କୋଳକୋଳି ବୋଲି ସେ କଟାକ୍ଷ କରିଥିଲେ । ବିରୋଧୀ ନିଜକୁ ପଚାରନ୍ତୁ, କାହାକୁ ଆରୋପ କରୁଛନ୍ତି । ତାଙ୍କ ଫଟୋ ମଧ୍ୟ ବାହାରେ ବୁଲୁଛି । ବିରୋଧୀ ନିଷ୍ପତ୍ତି ନେଇଛନ୍ତି, ପ୍ରତି କଥାରେ ସରକାରଙ୍କୁ ବିରୋଧ କରିବେ । ଗୃହରେ ବିରୋଧୀଙ୍କ ହଙ୍ଗାମା ଚାଲିଥିବା ବେଳେ କଂଗ୍ରେସ ସଦସ୍ୟ ତାରା ବାହିନୀପତି ବାଚସ୍ପତିଙ୍କ ପୋଡୟମ ଉପରକୁ ଚଢିଯାଇଥିଲେ । ବାଧ୍ୟ ହୋଇ ବାଚସ୍ପତି ଗୃହକୁ ଅପରାହ୍ଣ ୪ଟା ପର୍ଯ୍ୟନ୍ତ ମୁଲତବୀ ଘୋଷଣା କରିଥିଲେ ।
