ଝାମୁନିଆଁରେ ଚାଲିଲେ ସମ୍ବିତ ପାତ୍ର, କ’ଣ ରଖିଛନ୍ତି ମାନସିକ ?

ପୁରୀ (ବଡ଼ ଖବର ବ୍ୟୁରୋ):  ମାନସିକ ପୂରଣ ପାଇଁ ନିଆଁରେ ଚାଲିଲେ ବିଜେପି ରାଷ୍ଟ୍ରୀୟ ମୁଖପାତ୍ର ଡା. ସମ୍ବିତ ପାତ୍ର । ମଙ୍ଗଳବାର ଝାମୁନିଆଁରେ ଚାଲିଛନ୍ତି ସମ୍ବିତ । ଯାହା ଚର୍ଚ୍ଚାର ବିଷୟ ପାଲଟିଛି । ମଙ୍ଗଳବାର ଅପରାହ୍ନରେ ପୁରୀ ସଦର ସମଙ୍ଗ ପଞ୍ଚାୟତ ରେବତୀ ରମଣ ଗ୍ରାମର ଅଧିଷ୍ଠାତ୍ରୀ ଦେବୀ ଦୂଲଣା ଠାକୁରାଣୀଙ୍କ ନିକଟରେ ଝାମୁଯାତ୍ରାରେ ମାନସିକଧାରୀ ପାଟୁଆମାନେ ନିଆଁରେ ଚାଲିଥିଲେ । ଆଖପାଖ ଅଞ୍ଚଳର ଲୋକମାନେ ମଧ୍ୟ ଏହି ଯାତ୍ରାରେ ଯୋଗ ଦେଇଥିଲେ । ଗ୍ରାମବାସୀଙ୍କ ଅନୁରୋଧକ୍ରମେ ସମ୍ବିତ ପାତ୍ର ଏହି ଯାତ୍ରାରେ ଯୋଗ ଦେଇଥିଲେ ।

ଝାମୁନିଆଁରେ ଚାଲିଲେ ମାନସିକ ପୂରଣ ହୁଏ ବୋଲି ଦଳର କେତକ କର୍ମୀ ତାଙ୍କୁ କହିଥିଲେ । ଯାହାକୁ ନେଇ ସମ୍ବିତ ଝାମୁ ନିଆଁରେ ଚାଲିବା ପାଇଁ ଆଗ୍ରହ କରିଥିଲେ । ମନ୍ଦିରର ପୂଜକ ତାଙ୍କ ବେକରେ ଫୁଲମାଳ ପକାଇବା ପରେ ଖାଲି ପାଦରେ ଝାମୁ ନିଆଁରେ ଚାଲିଥିଲେ ସମ୍ବିତ । ତେମେ ସେ କ’ଣ ମାନସିକ ରଖି ଝାମୁ ନିଆଁରେ ଚାଲିଛନ୍ତି ତାହା ସାର୍ବଜନୀନ ଭାବେ ପ୍ରକାଶ କରିନାହାନ୍ତି ।