ନବୀନ ଧନୀରେ ତୃତୀୟ, ପାଠରେ ଗ୍ରାଜୁଏସନ୍, ମାଟ୍ରିକ ପାସ୍ କରି ସିନ୍ଦେ ମୁଖ୍ୟମନ୍ତ୍ରୀ
ଭୁବନେଶ୍ୱର(ବଡ଼ ଖବର ବ୍ୟୁରୋ): ସାରାଦେଶରେ ନବୀନ ହେଉଛନ୍ତି ତୃତୀୟ ଧନୀ ମୁଖ୍ୟମନ୍ତ୍ରୀ । ସବୁଠୁ ଧନୀ ଆନ୍ଧ୍ର ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀ । ସବୁଠୁ ଗରିବ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଶେଷଥର ପାଇଁ ଲଢିଥିବା ନିର୍ବାଚନରେ ଦାଖଲ କରିଥିବା ସତ୍ୟପାଠ ଆଧାରରେ ଏହି ରିପୋର୍ଟ ପ୍ରସ୍ତୁତ କରିଛି ଆସୋସିଏସନ ଫର୍ ଡେମୋକ୍ରାଟିକ ରିଫର୍ମସ ବା ଏଡିଆର୍ । ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟରେ ସ୍ଥାବର ଓ ଅସ୍ଥାବର ସମ୍ପତ୍ତି ମିଶାଇ ସମୁଦାୟ ମୂଲ୍ୟ ହେଉଛି ୬୩ କୋଟି ୮୭ ଲକ୍ଷ ଟଙ୍କା । ସେହିଭଳି ଆନ୍ଧ୍ର ମୁଖ୍ୟମନ୍ତ୍ରୀଙ୍କ ସମ୍ପତ୍ତି ମୂଲ୍ୟ ହେଉଛି ୫୧୦ କୋଟି । ତାଲିକାର ଦ୍ୱିତୀୟରେ ଅଛନ୍ତି ଅରୁଣାଚଳ ପ୍ରଦେଶ ମୁଖ୍ୟମନ୍ତ୍ରୀ ପେମା ଖାଣ୍ଡୁ । ସବୁଠୁ ଗରିବ ମୁଖ୍ୟମନ୍ତ୍ରୀ ମମତାଙ୍କ ସମ୍ପତ୍ତି ମୂଲ୍ୟ ହେଉଛି ମାତ୍ର ୧୫ ଲକ୍ଷ ୩୮ ହଜାର ଟଙ୍କା । ଅନ୍ୟପକ୍ଷରେ, ଏହି ରିପୋର୍ଟ ଅନୁଯାୟୀ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନାଁରେ କୌଣସି ଅପରାଧିକ ମାମଲା ନାହିଁ ।
ଏହାସହ ଏହି ରିପୋର୍ଟରେ ମୁଖ୍ୟମନ୍ତ୍ରୀମାନଙ୍କ ଶିକ୍ଷଗତ ଯୋଗ୍ୟତା ମଧ୍ୟ ପ୍ରକାଶ କରିଛି ଏଡିଆର । ରିପୋର୍ଟ ଅନୁଯାୟୀ, ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଶିକ୍ଷାଗତ ଯୋଗ୍ୟତା ହେଉଛି ଗ୍ରାଜୁଏସନ । ନବୀନଙ୍କ ସମେତ ୧୧ ମୁଖ୍ୟମନ୍ତ୍ରୀ ଗ୍ରାଜୁଏଟ । ଦେଶର ୯ ଜଣ ମୁଖ୍ୟମନ୍ତ୍ରୀ ପୋଷ୍ଟ ଗ୍ରାଜୁଏଟ । ୪ ଜଣ ଗ୍ରାଜୁଏଟ ପ୍ରଫେସନାଲ । ଏକମାତ୍ର ମୁଖ୍ୟମନ୍ତ୍ରୀ ଭାବେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଡକ୍ଟରେଟ ପାଇଛନ୍ତି । ଗୁଜୁରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ରଭାଇ ପଟେଲ ଡିପ୍ଲୋମା କରିଛନ୍ତି । ସବୁଠୁ କମ୍ ଶିକ୍ଷାଗତ ଯୋଗ୍ୟତା ଭାବେ ମହାରଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଦଶମ ପାସ୍ ବୋଲି ଦର୍ଶାଇଛନ୍ତି । ଏହି ରିପୋର୍ଟରେ ଧନୀ ତାଲିକାରେ ନବୀନଙ୍କୁ ୩ନମ୍ବରରେ ଦେଖି ଆକ୍ଷେପ କରିଛନ୍ତି ବିରୋଧୀ । ଯାହାର ଉତ୍ତର ଦେଇଛି ବିଜେଡି । ଏହି ରିପୋର୍ଟରେ ଶିକ୍ଷାଗତ ଯୋଗ୍ୟତା ନେଇ ସବୁଠୁ ଚର୍ଚ୍ଚିତ ହେଉଛନ୍ତି ଏକନାଥ ସିନ୍ଦେ । ଜଣେ ଅଟୋ ଚାଳକରୁ ରାଜନୀତିର ଶିଖରରେ ପହଞ୍ଚିଛନ୍ତି ସେ । ମାତ୍ର ମାଟ୍ରିକ ପଢି ମହାରାଷ୍ଟ୍ର ଭଳି ରାଜ୍ୟର ମୁଖ୍ୟମନ୍ତ୍ରୀ ସେ ।