କଂଗ୍ରେସରେ ସାମିଲ ହେଲେ ଲକ୍ଷ୍ମଣ ସାବଦୀ

ବେଙ୍ଗାଲୁରୁ (ବଡ଼ ଖବର ବ୍ୟୁରୋ): କର୍ଣ୍ଣାଟକର ପୂର୍ବ ଉପ ମୁଖ୍ୟମନ୍ତ୍ରୀ ଲକ୍ଷ୍ମଣ ସାବଦୀ ବିଜେପିରୁ ଇସ୍ତଫା ଦେଇ କଂଗ୍ରେସରେ ଯୋଗ ଦେଇଛନ୍ତି । ଏନେଇ କର୍ଣ୍ଣାଟକ କଂଗ୍ରେସ ଅଧ୍ୟକ୍ଷ ଡି.କେ ଶିବକୁମାର ସୂଚନା ଦେଇଛନ୍ତି । ୧୨ ତାରିଖ ଦିନ ଲକ୍ଷ୍ମଣ ସାବଦୀ ବିଜେପିରୁ ଇସ୍ତଫା ଦେଇଥିଲେ । ତାଙ୍କ ନିର୍ବାଚନ ମଣ୍ଡଳୀରୁ ତାଙ୍କୁ ବିଜେପି ଟିକେଟ ନଦେବାରୁ ସେ ବିଧାନପରିଷଦ ସଭ୍ୟ ସହ ବିଜେପିର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ।

ସେ କହିଥିଲେ କି ମୁଁ ମୋର ନିଷ୍ପତ୍ତି ନେଇ ସାରିଛି। ମୁଁ ଭିକ୍ଷା ଥାଲି ନେଇ ବୁଲିବା ଲୋକ ନୁହେଁ, ମୁଁ ଜଣେ ସ୍ୱାଭିମାନୀ ରାଜନେତା। ମୁଁ କାହା ଚାପରେ ଆସି କାମ କରୁନାହିଁ। କର୍ଣ୍ଣାଟକ କଂଗ୍ରେସ ଅଧ୍ୟକ୍ଷ ଡିକେ ଶିବକୁମାର କହିଛନ୍ତି କି ଅନେକ ଆଲୋଚନା ପରେ ଲକ୍ଷ୍ମଣ ବିନା ସର୍ତ୍ତରେ କଂଗ୍ରେସରେ ଯୋଗ ଦେଇଛନ୍ତି । ତାଙ୍କୁ ବିଜେପିରେ ଅପମାନିତ କରାଯାଉଥିଲା ।

ଏହାସହ ଲକ୍ଷଣଙ୍କୁ ଅଥାନୀ ବିଧାନସଭା ଆସନରୁ କଂଗ୍ରେସ ଟିକେଟ ଦେବ ବୋଲି ସିଦ୍ଧରମୈୟା ସ୍ପଷ୍ଟ କରିଛନ୍ତି । ସେପଟେ ସାବଦୀ ବିଜେପି ଛାଡିବା ପରେ କର୍ଣ୍ଣାଟକ ବିଜେପିର ବରିଷ୍ଠ ନେତା ତଥା ପୂର୍ବ ମୁଖ୍ୟମନ୍ତ୍ରୀ ବିଏସ ୟେଦ୍ଦୁରୂପା କହିଛନ୍ତି କି ବିଜେପି ସାବଦୀଙ୍କୁ ସବୁକିଛି ଦେଇଥିଲା । ହେଲେ ସେ କାହିଁକି ଦୁଖୀ ସେକଥା ତାଙ୍କୁ ଜଣାଥିବ ବୋଲି ୟେଦ୍ଦୁରୂପା କହିଛନ୍ତି ।