ରାଜ୍ୟରେ ବଢିବାରେ ଲାଗିଛି ସିଜରିଆନ ଡେଲିଭରି

ଭୁବନେଶ୍ୱର (ବଡ଼ ଖବର ବ୍ୟୁରୋ):  ରାଜ୍ୟରେ ବଢିବାରେ ଲାଗିଛି ସିଜରିଆନ ଡେଲିଭରି । ସ୍ୱାଭାବିକ ଠାରୁ ଅଧିକ ଲୋକେ ସିଜରିଆନ ଡେଲିଭରିକୁ ଆପଣାଉଛନ୍ତି । ନରମାଲ ଡେଲିଭରି ତୁଳନାରେ ସିଜରିଆନ ଡେଲିଭରି ସଂଖ୍ୟା କ୍ରମଶଃ ବୃଦ୍ଧି ପାଇବାରେ ଲାଗିଛି । ୨୦୧୯ରୁ ୨୦୨୧ ମଧ୍ୟରେ ସିଜରିଆନ ଡେଲିଭରି ହାର ୫୩.୭ ପ୍ରତିଶତରୁ ୭୦.୭ ପ୍ରତିଶତକୁ ବୃଦ୍ଧି ହୋଇଛି । ଯାହାକୁ ନେଇ ଉଦବେଗ ପ୍ରକାଶ କରିଛି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ । ଏହାକୁ ଦୃଷ୍ଟି ରଖି ସମସ୍ତ ଘରୋଇ ହସ୍ପିଟାଲରେ ସି- ସେକ୍ସନ ଅଡିଟ କରିବାକୁ ନିଷ୍ପତ୍ତି ନିଆଯାଇଛି ।

ସ୍ୱାସ୍ଥ୍ୟ ଓ ପରିବାର କଲ୍ୟାଣ ନିର୍ଦ୍ଦେଶକ ସମସ୍ତ ଜିଲ୍ଲା ମୁଖ୍ୟ ଅଧିକାରୀ ଓ ସହରାଞ୍ଚଳ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଆସନ୍ତା ମେ ୧ ରୁ ଅଡିଟ ଆରମ୍ଭ ହେବ । ୩ ପର୍ଯ୍ୟାୟରେ ଅଡିଟ ଆରମ୍ଭ ହେବ । ପ୍ରଥମେ ନିର୍ଦ୍ଧାରିତ ଫର୍ମାଟରେ ଅଡିଟ କରାଯିବ । ପରେ ଏହାକୁ ଫର୍ମାଟ ବିରେ ଅଡିଟ କରାଯିବ । ଜନସ୍ୱାସ୍ଥ୍ୟ ଅଧିକାରୀ ଓ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଠିକ ଭାବେ ଅଡିଟ କରିବା ପରେ ଫର୍ମାଟ-ସିରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ନିର୍ଦ୍ଦେଶାଳୟକୁ ପଠାଯିବ ।