ଆଜି ବି ମନେ ପଡ଼େ ସେହି ହୃଦୟ ଥରା ଦୃଶ୍ୟ

ଭୁବନେଶ୍ୱର  (ବଡ଼ ଖବର ବ୍ୟୁରୋ):  ୨୦୧୯ ମେ’ ୩ । ଆଜିକୁ ଠିକ ୪ ବର୍ଷ । ଓଡ଼ିଶା ଦେଖିଥିଲା ‘ଫନି’ର ତାଣ୍ଡବ । ଓଡ଼ିଶାର କୋଣ ଅନୁକୋଣରେ ଫନିର ଥିଲା କରାଳ ଚିତ୍ର । ଉଜୁଡାଇ ଥିଲା ଲୋକଙ୍କ ସଂସାର । ବେଘର ହୋଇଥିଲେ ଅନେକ ଲୋକ । ବାଦ ମଧ୍ୟ ପଡ଼ିନଥିଲେ ପଶୁପକ୍ଷୀ । ସକାଳ ୮.୩୫ । ପୁରୀରେ ଲ୍ୟାଣ୍ଡଫଲ କରିଥିଲା ବାତ୍ୟା ଫନି । ସମୁଦ୍ରକୁଳିଆ ଅଞ୍ଚଳରେ ବହିଥିଲା ପବନ ।

ଆଉ ଆରମ୍ଭ ହୋଇଥିଲା ଫନିର ତାଣ୍ଡବ । ଘଣ୍ଟାପ୍ରତି ୨୦୦ କିମିରେ ବହିଥିଲା ପବନ । ନିମିଷକ ଭିତରେ ସବୁ କିଛି ଛାରଖାର କରିଦେଇଥିଲା । ବଡ଼ ବଡ଼ ପ୍ରାସାଦ ସହ ଉପୁଡ଼ି ଯାଇଥିଲା ବଡ଼ ବଡ଼ ଗଛ । ବ୍ରହ୍ମଗିରି, ସାତପଡ଼ା ଅଞ୍ଚଳର ଦୃଶ୍ୟ ଥିଲା ବେଶ୍ ହୃଦୟ ବିଦାରକ । ବାତ୍ୟା ‘ଫନି’ ଯୋଗୁଁ ଅଧା ଓଡ଼ିଶା ପ୍ରଭାବିତ ହୋଇଥିଲା । ପୁରୀ, କଟକ, କେନ୍ଦ୍ରାପଡ଼ା, ଖୋର୍ଦ୍ଧା ଓ ଜଗତସିଂହପୁର ବ୍ୟାପକ ଭାବେ ପ୍ରଭାବିତ ହୋଇଥିଲା । ବାଦ ପଡ଼ି ନଥିଲା ରାଜଧାନୀ ।

ଫନି ପ୍ରଭାବରେ ସବୁଜିମା ଭୁବନେଶ୍ୱର ପାଲଟିଥିଲା ଶ୍ରିହୀନ । ସେପଟେ ଏହି ବାତ୍ୟାରେ ରାଜ୍ୟର ବିଭିନ୍ନ ସ୍ଥାନରେ ୬୪ ଜଣଙ୍କ ମୃତ୍ୟୁ ହୋଇଥିବା ବେଳେ ୧ ଲକ୍ଷ ୪୦ ହଜାର ହେକ୍ଟର ଫସଲ ନଷ୍ଟ ହୋଇଥିଲା । ୫ ଲକ୍ଷ ୫୬ ହଜାର ଘର କ୍ଷତିଗ୍ରସ୍ତ ହୋଇଥିଲା । ୬, ୨୮୧ ଗୃହ ପାଳିତ ପଶୁଙ୍କ ଜୀବନ ଯାଇଥିଲା ।

୧ ଲକ୍ଷ ୪୮ ହଜାର ୬୬୩ ହେକ୍ଟର ଚାଷ ଜମି ନଷ୍ଟ ହୋଇଥିବା ବେଳେ ୬ ହଜାର ୪୧୬ ବୋଟ୍, ୮ ହଜାର ୮୨୮ ଜାଲ ନଷ୍ଟ ହୋଇଥିଲା । ରାସ୍ତା, ବିଦ୍ୟୁତ୍, ରେଲୱେ, ଟେଲି କମ୍ୟୁନିକେସନ୍ ସର୍ବାଧିକ କ୍ଷତିଗ୍ରସ୍ତ ହୋଇଥିଲା ।