ପ୍ଲେ-ଅଫରେ ମୁହାଁମୁହିଁ ହେବେ ଗୁଜରାଟ ଟାଇଟନ୍ସ-ଚେନ୍ନାଇ ସୁପରକିଙ୍ଗସ୍
ଚେନ୍ନାଇ (ବଡ଼ ଖବର ବ୍ୟୁରୋ): ଆଜିଠୁ ଆଇପିଏଲ ପ୍ଲେ-ଅଫ । ପ୍ରଥମ କ୍ୱାଲିଫାୟରରେ ମୁହାଁମୁହିଁ ହେବେ ଗୁଜରାଟ ଟାଇଟନ୍ସ-ଚେନ୍ନାଇ ସୁପରକିଙ୍ଗସ୍ । ଏମ୍ଏ ଚିଦମ୍ବରମ ଷ୍ଟାଡିୟମରେ ଖେଳାଯିବ ଏହି ମ୍ୟାଚ । ଘରୋଇ ଟିମର ଅଧିନାୟକ ମହେନ୍ଦ୍ର ସିଂ ଧୋନିଙ୍କ ପାଇଁ ଏହି ମ୍ୟାଚ ବହୁତ ଖାସ ହେବ । କାରଣ ଧୋନିଙ୍କ ପାଇଁ ଏହା ସମ୍ଭବତଃ ଶେଷ ଆଇପିଏଲ୍ ମ୍ୟାଚ୍ । ତେଣୁ ଘରୋଇ ଦର୍ଶକ ନିଜ ପ୍ରିୟ ଖେଳାଳିଙ୍କୁ ବିଦାୟ ଦେବା ପାଇଁ ବିପୁଳ ମାତ୍ରାରେ ଉପସ୍ଥିତ ରହିବାର ସମ୍ଭାବନା ରହିଛି ।
କିନ୍ତୁ ଧୋନିଙ୍କ ଟିମ୍ ପକ୍ଷେ ଗୁଜରାଟ ଟାଇଟନ୍ସକୁ ହରାଇବା ସହଜ ହେବ ନାହିଁ । ଚଳିତ ସଂସ୍କରଣର ପ୍ରଥମ ମ୍ୟାଚରେ ଦୁଇ ଦଳ ପରସ୍ପରକୁ ଭେଟିଥିଲେ । ଯେଉଁଥିରେ ହାର୍ଦ୍ଦିକ ପାଣ୍ଡ୍ୟାଙ୍କ ଟିମ୍ ବିଜୟୀ ହୋଇଥିଲା । ତେବେ ଆଜି ଯେଉଁ ଦଳ ବିଜୟୀ ହେବ, ସେହି ଦଳ ସିଧାସଳଖ ଫାଇନାଲରେ ପହଞ୍ଚିବ। ରେକର୍ଡ ଦୃଷ୍ଟିରୁ ଗୁଜରାଟ ବର୍ତ୍ତମାନ ଜବରଦସ୍ତ ଫର୍ମରେ ରହିଛି । ଗୁଜରାଟ ୧୪ ମ୍ୟାଚରୁ ୧୦ ବିଜୟ ସହ ଶୀର୍ଷରେ ରହିଥିଲା ବେଳେ ଚେନ୍ନାଇ ୮ ବିଜୟ ସହ ଦ୍ୱିତୀୟରେ ରହିଛି ।