ସରକାରୀ କାର୍ୟ୍ୟାଳୟରେ ଝୁଲୁଛି ତାଲା

ନାଉଗାଁ (ବଡ଼ ଖବର ବ୍ୟୁରୋ) : ବାରମ୍ବାର ଦାବି ପରେ ଜଗତସିଂହପୁର ଜିଲ୍ଲା ନାଉଗାଁ ବ୍ଲକ ଅଫିସ୍ ପାଖରେ ଖୋଲିଛି ଉଦ୍ୟାନ କୃଷି କାର୍ଯ୍ୟାଳୟ । ନାଉଗାଁ ବ୍ଲକ ୧୬ଟି ପଞ୍ଚାୟତର କୃଷକମାନଙ୍କୁ ସ୍ୱାବଲମ୍ବୀ କରିବା ଏହି କାର୍ଯ୍ୟାଳୟର ଲକ୍ଷ୍ୟ ଓ ଉଦ୍ଦେଶ୍ୟ । ମାତ୍ର ଏହି ସରକାରୀ କାର୍ୟ୍ୟାଳୟଟି କେତେବେଳେ ଖୋଲେ ଓ କେତେବେଳେ ବନ୍ଦ ହୁଏ କୌଣସି ଚାଷୀ ଜାଣନ୍ତି ନାହିଁ । ସବୁ ସମୟରେ କାର୍ଯ୍ୟାଳୟ ଫାଟକରେ ତାଲା ଝୁଲୁଥିବା ଦେଖିବାକୁ ମିଳେ। ବାବୁମାନେ ତାଙ୍କ ଇଚ୍ଛାରେ ଆସନ୍ତି ଓ ତାଙ୍କ ଇଚ୍ଛାରେ ଯାଆନ୍ତି । ବହୁ ଦୁର ଦୂରାନ୍ତରୁ ଖର୍ଚ୍ଚାନ୍ତ ହୋଇ ଆସି ବାବୁମାନଙ୍କୁ ନ ପାଇ ନିରାଶ ହୋଇ ଫେରୁଥିବାରୁ ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି । ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏହି ଘଟଣା ପ୍ରତି ଦୃଷ୍ଟି ଦେବାକୁ ଚାଷୀମାନଙ୍କ ତରଫରୁ ଦାବି ହେଉଛି ।