ସତର୍କ ସଙ୍କେତ ଟପିଲା ବଂଶଧାରା

ଗୁଣୁପୁର, (ବଡ଼ ଖବର ବ୍ୟୁରୋ): ଲଘୁଚାପ ପ୍ରଭାବରେ ରାୟଗଡା ଜିଲ୍ଲା ଗୁଣୁପୁର ସମେତ ଆଖପାଖ ଅଞ୍ଚଳରେ ପ୍ରବଳ ବର୍ଷା ଜାରି ରହିଛି । ଅପରାହ୍ନ ୩ ଟାରୁ ବର୍ତ୍ତମାନ ଯାଏଁ ବର୍ଷା ଜାରି ରହିଥିବା ଯୋଗୁଁ ତଳିଆ ଅଞ୍ଚଳ ଜଳମଗ୍ନ ହୋଇଛି । ଗୁଣୁପୁରଠାରେ ପ୍ରବାହିତ ବଂଶଧାରା ନଦୀ ଜଳସ୍ତର ସତର୍କ ସଂକେତ ଟପିଛି । ଆଜି ସନ୍ଧ୍ୟା ସୁଦ୍ଧା ଗୁଣୁପୁରରେ ୧୪ ସେଣ୍ଟିମିଟର ବର୍ଷା ରେକର୍ଡ କରାଯାଇଛି । ଗୁଣୁପୁରରେ ବିଶେଷ କରି ଉପଜିଲ୍ଲାପାଳଙ୍କ କାର୍ୟ୍ୟାଳୟ, ସୌରା ପ୍ରଧାନୀଗୁଡା, ବାଇପାସ ଛକ, ନୂତନ ବସଷ୍ଟାଣ୍ଡ ଅଞ୍ଚଳ ପୁରା ପୁରି ଜଳମଗ୍ନ ହୋଇଯାଇଛି। କିଛି ସ୍ଥାନରେ ଲୋକଙ୍କ ଘରେ ଓ ଦୋକାନ ବଜାରରେ ପାଣି ପସିଯାଇଥିବା ଦେଖିବାକୁ ମିଳିଛି ।

ଏସ ପି ଗୁଡା ଛକରେ ୩ ଫୁଟ ଉଚ୍ଚତାର ପାଣି ଜମି ରହିଥିବାରୁ ଗୁଣୁପୁର ପୁଟାସିଂ ଯାତାୟତରେ ବାଧାପ୍ରାପ୍ତ ହୋଇଛି । ସେହିପରି ଭାବେ ଜଗନ୍ନାଥପୁର ନାଳରେ ପ୍ରବଳ ପାଣି ପ୍ରବାହିତ ହେଉଥିବାରୁ ଗୁଣୁପୁରରୁ ଆନ୍ଧ୍ର ପ୍ରଦେଶକୁ ଯାତାୟତ ମଧ୍ୟ ବାଧାପ୍ରାପ୍ତ ହୋଇଛି । ଅନ୍ୟପକ୍ଷରେ ରାତି ହୋଇଯିବା ଓ ବିଜୁଳି ନଥିବାରୁ ବର୍ଷାରେ ଲୋକେ ନାହିଁ ନଥିବା ସମସ୍ୟା ରେ ସମ୍ମୁଖୀନ ହୋଇଛନ୍ତି। ପ୍ରଶାସନ ତରଫରୁ ୪୩ଜଣ ବିପନ୍ନଙ୍କୁ କଲ୍ୟାଣ ମଣ୍ଡପରେ ରନ୍ଧା ଖାଦ୍ୟର ବ୍ୟବସ୍ଥା କରିଥିବା ତହସିଲଦାର ସୂଚନା ଦେଇଛନ୍ତି। ଗତ ୩୦ ବର୍ଷ ଧରି ଏଭଳି ବର୍ଷା ଓ ପ୍ରବଳ ପାଣି ପ୍ରବାହିତ ହେଉଥିବା ସ୍ଥାନୀୟ ଲୋକେ କେବେ ଦେଖି ନଥିବା ପ୍ରକାଶ କରିଛନ୍ତି ।